Amakhosi asayinise umdlali omusha
IKaizer Chiefs FC isisayinise ngokusemthethweni umdlali wasemuva omusha ozoqinisa isikwati sayo ngaphambi kwesizini ka-2024/25.
Le kilabhu ibidonsa kanzima emuva eminyakeni edlule kanti manje inqume ukusayina umdlali wasemuva omusha. Bahlukane noNjabulo Ngcobo ekupheleni kwesizini edlule kanti manje sebemtholile ozovala isikhala sakhe.
Ngokubika kwe FARPost lezi zinkunzi zaseSoweto zisayinise umdlali wasemuva odabuka e-Angola uMiguel Inacio osuka kwiPetro de Luanda. Amakhosi afuna ukuqinisa isikwati sawo ngesizini ka-2024/25 kwiBetway Premiership.
Lo mdlali udlala njenge-Centre-Back nanjengeRight Back. Uba ngumdlali wesihlanu ukujoyina Amakhosi kule sizini.
Leli qembu lisayinise abadlali abafana noFiacre Ntwari obekwiTS Galaxy FC, Bongani Sam obekwi-Orlando Pirates FC noRushwin Dortley obekwiCape Town Spurs FC.
Amakhosi aphinde asayinisa omunye umdlali onamava ukuze aqinise iqembu lawo. Basayine umdlali wasesiswini ohamba phambili wase-Uruguay uGaston Sirino ohlukane neMamelodi Sundowns FC ekupheleni kwesizini edlule.
U-Inacio uzoqhudelana nabadlali abafana noZitha Kwinika, Given Msimango, Reeve Frosler, Dillan Solomons nomdlali wasemuva osemncane uMcCarthy endaweni yakhe eNaturena.
