Amakhosi ayavutsa lamalanga, sebaphindze bashiya umlandvo ePeter Mokaba Stadium

I-Kaizer Chiefs iyachubeka ngekukoleka emaphuzu ku-Betway Premiership, ngemuva kwekutsi badhaye iMagesi FC 4-1, ePeter Mokaba Stadium ngoLwesitsatfu ebusuku.

Amakhosi sekancobe imidlalo lesihlangu kulandzelana yeligi (Betway Premiership), bashaya i-Durban City, i-Magesi FC, iTS Galaxy, Orbit College, babuya baphindza iMagesi FC futsi.

Letingcalamba tase-Soweto setidlale imidlalo lengemashumi lamabili nakutsatfu, banemaphuzu langemashumi lamane nesihlanu, bangete sikhala sekushiya nombolo-4, AmaZulu FC.

I-Magesi yona icindzeteleke kwekutsi yehle, iyohlala emsileni walelitafula le-Betway Premiership, badlale imidlalo lengemashumi lamabili nakune, banemaphuzi layi-17.

I-Chiefs kucale yona yavula inkundla ngeligoli lelishatjwe ngu-Flavio da Silva, ahlanganisa lakhe lesikhombisa lalesizini.

Ngembi kwekutsi kuyiwe ekhefini, Wandile Duba ubuye washaya lesibili ngemuva kwekutsi badlali bemagesi nanozinti Elvis Chipezeze wabo bente liphutsa phakatsi ebhokisini.

Utse lomdlalo nawubuya ekhefini, iMagesi yabuya ngemandla kodvwa iChiefs ichubeke yaba yingoti kakhulu. Mduduzi Shabalala washaya lesitsatfu ngebhola lefakwe ngu-Flosler lobekacedza kungena.

I-Magesi iphendvule ngeligoli lekubika lelishatjwe ngu-Diteboho Mofokeng ngenhloko angakamakwa, bazamile kubuya ngemqndla kodvwa akumange kubasebentele.

Mayo longene esikhundleni sa-Da Silva ufike wacedzisa ngeligoli lakhe lesibili lalesizini, lesine kulomdlalo, waphela nga4-1 lomdlalo iChiefs yaphumelela njalo.

Lemiphumela ibeka iChiefs dvutane ne-Pirates lehleli kunombolo-2, batawube balindzele kukhuphula emaphuzu abo, nabayohlangana ne-Polokwane City kulomdlalo wabo lolandzelako.

By:Nkosinathi