Ayafezeka emaphupho a-Thembinkosi Lorch ebholeni letinyawo
Thembinkosi Lorch loneminyaka lengu-32 ngebudzala lowabolekiswa kulicembu lase-Moroco i-Wydad Cassablanca ngenyanga ya-Bhimbidvwane kulomnyaka.
Lomdlali udlale ngekutimisela kulelicembu wajabulisa balandzeli nebaphatsi belicembu kumidlalo ye-Botola Pro league nakumidlalo yemave onkhe jikelele lesezingeni lelisetulu kakhulu i-FIFA Club World Cup.
Kulemidlalo ye-FIFA Club World Cup lebeyidlala eveni lase-USA, Lorch ukhombise kutikhandla kakhulu wajabulisa balandzeli labaningi, kumidlalo yabo lapho bacudzelene khona nemacembu lamakhulu lafaka ekhatsi i-Manchester City, i-Juventus kanye ne-Al Ain, washaya ligoli linye kulomncitiswano we-FIFA Club World Cup.
Steve Kapeluschnik loyi-Agent ya-Lorch uyavuma kutsi lesivumelwano sekutsi Lorch ahambe sichubekela phambili, “Yebo, kuliciniso kwekutsi kunenchubekela phambili kwekutsi Lorch ahambe ayocala likhasi lelihle ngemphilo yakhe ebholeni letinyawo. Kodvwa kutsi uyakuliphi licembu inkhulumo lefihlakele letawumemetelwa ngulamacembu.” Kapeluschnik utjele baka-SABC Sport.
Licambu le-Wydad litsatse sikhatsi kutsi licedzelele ku-sayina Lorch ngemuva kutsi kuphele sigaba sakhe se-loan, kodvwa lucwaningo luvetele live lonkhe kwekutsi sivumelwano sesentiwe, Lorch uyabuyela kulelase-Nshonalanga ye-Afrika kuyojoyina i-The Red Castle i-Wydad Cassablanca.
