I-Arrows seyicolisile mayelana nekubadlulula  umdlali weChiefs ngekwelibala

IGolden Arrows iphoceleke kutsi itsatse tinyatselo ngekushesha ngemuva kwekutsi lomunye webasebenti bayo labaphetse tinkhundla tekuchumana afake umbhalo lowehlise sitfunti semdlali weKaizer Chiefs.

Lombhalo, lowente umsindvo lomkhulu, bewubhalwe ngesiZulu ngaphambi kwemdlalo weMTN8 neChiefs lotawudlalwa ngeLisontfo.

Lombhalo bewutsi: “UShezi angeke ehlulwe kumaka isishawa.”

Ngemuva kwekutsi lombhalo usabalale uputjuke etinkundleni tekuchumana futsi uvuse intfukutselo kubalandzeli bebhola, wasuswa ngekuphutfuma kwase.kukhishwa nemlayeto wekucolisa.

Noma nje, lombhalo bewungakasho ligama lemuntfu, bekucacile kutsi bewubhekiswe kumdlali weKaizer Chiefs, Luke Baartman, lophila ne-albinism.

Ligama lelitsi “isishawa” lisetjentiswa njengekuhlambalata nekwehlisa sitfunti sebantfu labaphila ne-albinism, lokwente bantfu labanyenti basole iGolden Arrows ngalesehlakalo.

Esitatimendeni lesikhishwe yi-UP BACK THROUGH PODCAST, iGolden Arrows idlulise kucolisa kubalandzeli beKaizer Chiefs nakubo bonkhe labativile baphatsekile ngalombhalo.

“I-UP BACK THROUGH PODCAST icela sicolo lesikhulu kubalandzeli beKaizer Chiefs nakubo bonkhe bantfu labatsintsekile ngalenkhulumo yetfu.»

“Inhloso bekukutidlalela nje. Nangabe loko kutsatfwe kabi, siyacolisa kini basePhefeni.”

Story by Nkosinathi Masinga

 
FUNDZA NALANA: Baartman uveta umtselela wa-Kaizer Motaung Jr