IPirates isimemezele umdlali omusha
I-Orlando Pirates FC isimemezele ngokusemthethweni ukuthi isayinise umdlali wasemuva omusha ngaphambi kwesizini ka-2024/25.
AmaBhakabhaka abe nenkinga kwesokudla emuva ngesizini edlule kwazise uMonyane noShandu bebelimele. Banqume ukusayinisa uThabiso Lebitso ophuma kwiChippa United FC.
Le kilabhu ibisebenzisa umdlali wasesiswini ohlangothini lwesokudla emuva ngesizini edlule. Bebedlala ngoFortune Makaringe osekwiCape Town City FC.
Manje uLebitso ulimele kanti uShandu naye usalimele akakalulami. NguMonyane kuphela ongalimele kubadlali be-Orlando Pirates FC abadlala kwesokudla emuva.
Khonamanjalo, amaBhakabhaka anqume ukusayinisa umdlali omusha ozoqinisa isikwati salo kwazise uShandu no Lebitso balimele. Basayine ukaputeni weStellenbosch FC uDeano Van Rooyen.
“I-Orlando Pirates Football Club iyakuthokozela ukumemezela ukuthi isisayinise uDeano van Rooyen weStellenbosch FC,” kumemezela amaBhakabhaka namhlanje ntambama.
Lo mdlali usayine inkontileka yeminyaka emithathu namaBhakabhaka njengoba kuvezwe yi-Orlando Pirates FC.
“Lo mdlali, 27, usayine inkontileka yeminyaka emithathu namaBhakabhaka, ehlanganisa nenye yeminyaka emibili.”
Lo mdlali uzoletha inqwaba yezinto ezinhle kumaBhakabhaka ngolwazi aluthole kwiStellenbosch FC. Usize iStellies ukuthi siwine indebe yokuqala ngqa ngesizini edlule kwiPremier Soccer League.
Banqobe iCarling Knockout Cup behlula iTS Galaxy FC kowamanqamu. Uphinde wasiza leli qembu ukuthi lifinyelele kwiCAF Confederation Cup okokuqala emlandweni walo.
