IRich Boys izokwamukela AmaTuks namhlanje ntambama
Iqembu elizinze KwaZulu-Natal, iRichards Bay FC, lizobe lidlala umdlalo walo wokuqala wePSL Promotional Playoffs namuhla ne-University of Pretoria FC eKing Zwelithini Stadium.
INatal Rich Boys iqede isizini ka-2023/24 ihlezi endaweni ka-15 kuDStv Premiership. Ngakolunye uhlangothi, AmaTuks aqede endaweni yesibili kuMotsepe Foundation Championship.
Elinye iqembu lesithathu elikwiPSL Promotional Playoffs yiqembu laseLimpopo iBaroka FC. IBaroka iqede endaweni yesithathu kuMotsepe Foundation Championship.
IRichards Bay FC ayizange ibe nesizini enhle kule sizini njengoba ihlulwe imidlalo eminingi. Le sizini sekungokwesibili ilandelana ukuthi iqembu laseKZN lidlale imidlalo yePSL Promotional Playoffs.
Ngesizini edlule kube yiMaritzburg United FC njengoba iqede endaweni ka-15 kuDStv Premiership. Ngeshwa iTeam of Choice ayizange isinde kuPSL Promotional Playoffs futhi manje isidlala kuMotsepe Foundation Championship.
IRich Boys idinga ukunqoba yonke imidlalo yayo ukuze isinde. Lo mdlalo kuzobe kuwumdlalo wawo wokuqala kanti AmaTuks asevele adlale umdlalo wawo wokuqala anqoba ngo 1-0 bedlala neBaroka FC ngeSonto.
Umdlalo wanamuhla uhlelelwe u-15:00 eKing Zwelithini Stadium, uzobe ubukhoma kuSuperSport PSL neSABC Sport. IRich Boys isendaweni yesibili kanti AmaTuks asendaweni yokuqala ngamaphuzu amathathu.
