Lokubange i-Chiefs yaphutfumisa Mako ekhaya

I-Kaizer Chiefs iveta lokubente batsatsa sincumo sekubuyisa lomdlali wabo wasemuva  Paseka Mako ekhaya.

Paseka bekavakashe nalelicembu ekhempini
yekulungiselela isizini e-Spain, kodvwa sekuvele kutsi sewubuyile ekhaya.

Ngekubika kwe-Soccer Beat, Amakhosi abuyisele Paseka Mako eNingizimu Afrika ngemuva kwekwephuka ligalo emdlalweni webungani ne-Al Kholood yaseSaudi Arabia ngaLesibili.

Lomdlali utawuhlolwa ngudokotela longuchwepheshe wematsambo kuze kutfolakale kutsi kulimala kwakhe kubi kangakanani nekutsi utawudzinga sikhatsi lesingakanani ngaphambi kwekubuyela enkhundleni.

‘Computer’ wajoyina Amakhosi ekucaleni kwesizini leyengcile ngemuva kwekuhlukana ne-Orlando Pirates, lapho achitse khona iminyaka leminyenti.

Bekabukwa njengalomunye webadlali labetawuletsa emava nelwati lolujulile kulelicembu laseNaturena.

Futsi nje, akusikwekucala Paseka ahlangabetana nenkinga yekulimala ngesikhatsi sekulungiselela isizini.

Nangalesizini leyegcile walimala ngesikhatsi licembu lisekhempini yekuticocavoca e-Netherlands, lokwamenta waphutselwa midlalo leminyenti ekucaleni kwesizini.

Lokulimala kwakhe kwakamuva kusho kutsi Fernando Da Cruz angase aphoceleke kucala isizini angenaye lomunye webadlali bakhe labadlala ehlangotsini lasemuva kwesencele.

FUNDZA NALANA: Tindzaba letimbi nga-Mayo ku-Chiefs, kuvela lokungambambelela

Njengobe Paseka sekabuyele ekhaya, i-Kaizer Chiefs yona ichubeka nemalungiselelo esizini lensha e-Spain.

Story by Nkosinathi