Ncikazi ubika indlela yekushaya iSundown

Umceceshi lisekela we-Orlando Pirates Mandla Ncikazi, ugcugcutela licembu lakhe kutsi litinake lona kakhulu linganaki titsa talo noma labo leliyocudzelana nabo kulomdlalo lolandzelako.

Emabhakaniya ayovakashela i-Mamelodi Sundowns kulomdlalo lolandzelako we-Betway Premiership eNkhundleni yase Loftus ngomgcibelo ngensimbi ye15h30 emini.

Njengoba nje kusasekuseni kulesizini, lomdlalo kulindzeleke kutsi ubematima, tibe tindzala totimbili.

Lamacembu lamabili ahlukaniswa maphuzu lamatsatfu kulelitafula le-Betway Premiership, nanoma nje i-Pirates yona inemidlalo lemibili esandleni.

Kuncoba kwe-Orlando Pirates kulomdlalo kungayenta ilingane ne-Sundowns ngemaphuzu, Ncikazi utsi ngiyo vele intfo lebafuna yenteke.

“Ngulomunye umdlalo lonelitfuba lemaphuzu lamatsatfu,” kusho Ncikazi.

“Kwamele nje sibuke indlela yetfu yekudlala kuphela.”

“Kwamele singene emdlalweni ngendlela lefanele, sitfole nekugcugcuteleka ecenjini letfu- uma singenta loko sitimisele, angeke kube nendzaba kutsi kwentekeni ngetitsa tetfu.

“Kukabanti kakhulungatsi futsi nendlela lesidlala ngayo nangedlela sifaka ngakhona umfutfo. Uma singenta loko, lelinani lemaphuzu lamatsatfu litoba letfu.”

Kwekucala ngca ngemuva kweminyaka leminyenti, kutsi i-Pirates iye emdlalweni losetulu isesimeni lesihle sekutimisela, kutsi inco mdlalo wayo lesandza kuwudlala ibuye ibukane nelicembu lelisetulu.

I-Sundowns  ayikakhoni kudlala ngekutimisela ngendlela letsembisako kumidlalo yabo yeligi yale-sizini, ngephandle nje kwekutsi bangetulu.

Kantsi ke-iPirates leyancoba i-Sundowns kumdlalo we-MTN-8, balandzeli banelitsemba lekutsi kulomdlalo batawuphuma nemiphumela lemihle.