Owayengumdlali weChiefs usejoyine iMarumo Gallants
IMarumo Gallants FC isiqalile ukuqinisa isikwati sayo njengoba isibuyele kwiDStv Premiership ngaphambi kwesizini ka-2024/25.
IGallants igawulwe yizembe kwiDStv Premiership yayiswa kwiMotsepe Foundation Championship ekupheleni kwesizini ka-2022/23. Leli qembu aliphindanga libe nesizini enhle kwiMotsepe Foundation Championship ngesizini edlule.
Baqede endaweni ka-11 ngamaphuzu angu-36 kuphela emidlalweni engu-30. Bawine eyisishiyagalolunye, badlala ngokulingana eyisishiyagalolunye bahlulwa imidlalo engu-12 yeligi ngesizini edlule kwiMotsepe Foundation Championship.
Khonamanjalo, leli qembu selibuyele kwiDStv Premiership yize lingazange liwine iMotsepe Foundation Championship. Leli qembu lithenge iMoroka Swallows FC ebidayiswa.
Le kilabhu isayinise umdlali oyedwa kuphela kuze kube manje. Ngokubika kweFARPost le kilabhu isayinise uPhathutshedzo Nange owayengumdlali weKaizer Chiefs FC neSuperSport United FC.
UNange ubekwiSuperSport United FC ngesizini edlule kwiDStv Premiership. Akazange adlale imidlalo eminingi ngaphansi komqeqeshi uGavin Hunt. Lo mdlali udlale imidlalo eyisikhombisa yeligi kuphela engashayi ngisho nelilodwa igoli.
UNange usezohlangana nomqeqeshi wakhe wakudala uDylan Kerr. UKerr noNange bebendawonye kwiBlack Leopards FC ngesizini ka-2018/19 kwiDStv Premiership njengoba manje sebekwiMarumo Gallants FC.
Lokhu bekungaphambi kokuthi lo mdlali ajoyine iStellenbosch FC, Kaizer Chiefs FC neSuperSport United FC.
Lo mdlali uzoletha isipiliyoni esihle kwiBahlabane Ba Ntwa. UNange uke wadlalela iBafana Bafana phambilini ngesikhathi esekwiKaizer Chiefs kanti ubekhona ngesikhathi iBafana Bafana idlala neFrance ngo-2022.
