UDan Malesela usejoyine iqembu elisha kwiPSL
Umqeqeshi uDan “Dance” Malesela usejoyine ngokusemthethweni iqembu elisha kwiBetway Premiership njengomqeqeshi omusha wale kilabhu.
Lo mqeqeshi onamava waseNingizimu Afrika ujoyine iMarumo Gallants FC. IMarumo Gallants FC izodlala kwiBetway Premiership ngesizini ezayo njengoba ithenge isicoco seMoroka Swallows FC.
Le kilabhu iqashe uDylan Kerr ngaphambi kokuthi iqale i-pre-season yayo. Izindaba eziphuma kuleli qembu manje ukuthi uKerr usesulile njengomqeqeshi waleli qembu.
Lokhu kuza ngemuva kokuthi iqembu belifuna ukuthi abe yiCo-Coach hhayi umqeqeshi oyinhloko. Umqeqeshi uDylan Kerr unqume ukwesula ngenxa yalokhu eqenjini.
Lo mqeqeshi [uMalesela] uthole ukuhlonishwa okukhulu ebholeni laseNingizimu Afrika ngesikhathi ehlula Amakhosi kowamanqamu weNedbank Cup ngo-2019. Wayeqeqesha iTS Galaxy FC kanti leli qembu lalidlala kwiMotsepe Foundation Championship ngaleso sikhathi.
IMarumo Gallants FC izoqala isizini yayo ka-2024/25 kwiBetway Premiership ngenyanga ezayo. Bazobe bedlala nezinkunzi zaseSoweto iKaizer Chiefs FC eToyota Stadium, eBloemfontein.
