UKekana unomyalezo omuhle emaqenjini ePSL

Owayengumdlali wasesiswini weMamelodi Sundowns FC neBafana Bafana uHlompho Kekana usethumele umyalezo okhethekile emaqenjini ePSL ngemuva kokuthi iFIFA inqume ukuvala iTS Galaxy FC ekusayiniseni abadlali.

I-TS Galaxy FC yenze umsebenzi omuhle ngesizini edlule ngaphansi komqeqeshi uSead Ramovic. Le kilabhu iqede endaweni yesithupha kuDStv Premiership kanti izodlala iMTN 8 Cup ngesizini ezayo okokuqala emlandweni wayo.

I-TS Galaxy iphinde yakwazi ukufinyelela kowamanqamu weCarling Knockout Cup ngesizini edlule. Ngeshwa leli qembu lihlulwe yiStellenbosch FC edle umhlanganiso kulo mqhudelwano kanti leli qembu [iStellenbosch FC] lizobe lidlala kwiCAF Confederation Cup ngesizini ezayo okokuqala.

Nokho, izinto zingase zibe nzima kuTS Galaxy ngesizini ezayo njengoba ikilabhu ivinjwe yiFIFA ukubhalisa abadlali emawindini amathathu ezayo okuhwebelana ngabadlali.

Lokhu kuza ngemuva kwengxabano yenkontileka nomgadli wase-Ivory Coast, uBernad Yao Kouassi ojoyine leli qembu ngoJanuwari nyakenye kodwa walishiya ngo-Agasti engadlalanga ngisho nowodwa umdlalo.

I-TS Galaxy FC iyikilabhu yesine ngokuvinjelwa okusebenzayo manje kwiFIFA, ijoyina iRoyal AM FC, iRichards Bay FC kanye ne-JDR Stars FC. IKaizer Chiefs FC nayo yake yazibona ikulesi simo.

“Ngicabanga ukuthi kumele [siyilungise lento] ezweni lethu nasemidlalweni yeligi ngoba amaqembu [ake abhekana nalolu daba] yiRichards Bay, Royal AM ngisho neKaizer Chiefs izithole ikulesi simo lapho abadlali bevala khona izinkontileka zabo,” Kusho uKekana.

“Ngicabanga ukuthi lesi yisikhathi sokuthi amaqembu afunde. Abaphathi bamaqembu kumele bafunde ukuthi akusekho kudala lapho bezingekho khona izinkundla zokuxhumana, manje sekunzima.”