Vani, umbono wa-Pitso nge-Sundowns leyodlala i-CAF final
Lomceceshi loke wacecesha i-Mamelodi Sundowns Pitso Mosimane, utsi ubona i-Mamelodi Sundowns itsatsa indzebe ye-CAF Champions League.
Pitso akehli futsi akakhuphuki ngembono wakhe, utsemba ngalokugcwele kutsi lelicembu lakhe lakadzeni litawutsatsa lendzebe.
I-Sundowns iyodlala umdlalo we-CAF Champions League 1st leg, nelicembu le-ASFAR, eLoftus Versveld Stadium, ngemhlaka 16-INkhwenkhweti 2026, ngemgcibelo ntsambama.
Besekutsi i-2nd leg yalomncitiswano, itawutsatsa indzawo eveni lase-Morocco, ePrince Moullay Abdellah Stadium, ngeLisondvo, ngemhlaka 16-INkhwenkhweti 2026, ebusuku.
I-Sundowns isandza kudliwa kumdlalo wayo lobalulekile, we-Betway Premiership wemancamu. Badliwa i-TS Galaxy 3-2 eMbombela Stadium.
Lemiphumela ishiye lelicembu engotini yekuphonya kucukula lendzebe yesicoco se-Betway Premiership.
Kodvwa Pitso Mosimane ngekuhlatiya kwakhe, utsi ubona lelicembu licukula lendzebe njengobe liphetse badlali bonke labadzingekako kutsi bawine lemidlalo.
“I-Sundowns itawuwina. Akudzingeki mibuto ngaloku,”kusho Pitso.
“Benebadlali labangancoba, angitsi? Kantsi futsi lomceceshi utfole kutetsemba kulemidlalo yemancamu lemibili. Nyalo unelitsemba lekutsi utawuncoba.
“Kodvwa kungani bangayiwini nyalo? Umangabe bangayiwini nyalo……batsembeni kahle kahle?
“Khumbula kutsi ngike ngayitsatsa lento lena (iCAF) ngelicembu lebelingekho kulelizinga lale-Sundowns yanyalo.
“Bengibophele ngabo, Wayne Arendse, Titanic Mabunda, kanye na-Asanele Mbekile. Aside neliciniso Aside neliciniso, ngibo badlalali lengabafaka kumdlalo wemancamu ku-CAF.
“Kodvwa buka lesikwadi lebabophele ngaso nyalo,” kungetele yena.
By:Nkosinathi
