UThalente Mbatha ubizwe okokuqala kwiBafana
Umqeqeshi weBafana Bafana, u-Hugo Broos, usememezele isikwati sakhe sokuqala esizodlala ne-Uganda ne-South Sudan kweyokuhlungela i-Afcon ka-2025.
UBroos umemezele iqembu lakhe namuhla ntambama kanti isikwati sakhe sinoThalente Mbatha oneminyaka engu-24 we-Orlando Pirates FC. UMbatha uyaqala ngqa ukubizwa eqenjini lesizwe.
Lo mdlali ujoyine amaBhakabhaka ngoJanuwari nonyaka ebolekwe kwiSuperSport United FC. Lo mdlali udlale kahle kakhulu kwi-Orlando Pirates kusukela ngoJanuwari kuya kuJuni nonyaka.
Udlale imidlalo yeligi engu-11 kumaBhakabhaka wakwazi ukushaya igoli okungenani elilodwa. Ushaye igoli lakhe eHarry Gwala Stadium bebhekene neqembu langakubo iRoyal AM FC.
UMbatha uphinde wawina indebe yakhe yokuqala namaBhakabhaka ngesizini edlule kulo nyaka. Unqobe iNedbank Cup kwathi kowamanqamu wahlabana ngendondo yeMan of the Match ngokudlala kahle kwakhe.
Ekupheleni kwesizini edlule eziMnyama zinqume ukumthenga ngokusemthethweni kwiSuperSport United FC. Usengumdlali wamaBhakabhaka manje ngokuphelele.
Khonamanjalo, lo mdlali ubizwe ngumqeqeshi weBafana Bafana uHugo Broos esikwatini seBafana Bafana. KwiPirates nguyena, Sipho Chaine, Nkosinathi Sibisi, Relebohile Mofokeng, Patrick Maswanganyi no-Evidence Makgopa ababizelwe esikwatini seBafana Bafana.
IBafana Bafana izodlala umdlalo wayo wokuqala mhlaka-06 ngenyanga ezayo e-Orlando Stadium, eSoweto ne-Uganda. Umdlalo wabo wokugcina izowudlala neSouth Sudan mhla zili-10 eJuba Stadium eSouth Sudan.
Isikwati esiphelele seBafana Bafana esithombeni esingezansi:
