Eugene Zwane ‘uyabheja’ ngendvodzana yakhe, utsi kutoyilungela
Eugene Zwane loyinkakha ye-Orlando Pirates uvete kwekutsi indvodzana yakhe seyitawutfola litfuba lekudlala kulelicembu le-Siwelele FC.
Lomdlali loneminyaka lengu-24 ngebudzala, lobolekiswe i-Kaizer Chiefs ecenjini lase-Free State i-Siwelele FC kutsi atfole litfuba lelanele lekudlala.
Kodvwa nakhona nje Samkelo Zwane akumhambeli kahle, njengobe acale munye umdlalo, lena leminye ungene asuka ngaphandle ebhentjini.
Ngalesikhatsi abolekisiwe lomdlali wesisu, iChiefs isale yasayina badlali labenta kahle kakhulu endzaweni yakhe, bo-Lebohang Maboe, kanye na-Siphesihle Ndlovu.
Nanoma simo singalendlela, Eugene Zwane uyacizelela ngekutsi lomfana usendleleni lenhle kakhulu, uta kahle.
“Samkelo usendleleni lekahle kakhulu futsi usebenta kamatima. Ulindze nje litfuba lakhe,” kusho Zwane ku-Sowetan.
“Umceceshi vele uyohlala akhetsa badlali latsembe bona, kodvwa loku akusho kwekutsi kuphela kwemhlaba umangabe yena angakakhetfwa.”
Lenkakha leyatakhela umlandvo ecenjini le-Orlando Pirates, Zwane, utsi yena utibonela ngewakhe emehlo kutsi lendvodzana yakhe itikhandla kangakanani.
“Ngihlala naye, ngiyambona kwekutsi utikhandla kangakanani, nekutsi ukhatsateka kangakanani umangabe angalitfoliblitfuba lekudlala. Kodvwa loko kuyincenye yendlela yakhe,” kungeta yena.
By:Nkosinathi
