I-Banyana isindze ngekulambisa, Kgatlana wabalichawe

Thembi Kgatlana ushaye ligoli lelisite iBanyana Banyana yancoba iBurkina Faso nga 1-0, yatfola indzawo yayo kuma-quarterfinal eWomen’s Africa Cup of Nations (WAFCON) eCasablanca.

Kgatlana ushaye ligoli lekuncoba ngemizuzu lengu-21, kwatsi iBanyana yaphuma nemaphuzu lamatsatfu labalulekile.

Lomphumela usho kutsi iNingizimu Afrika seyitawuhlangana nelive lelibambe lomncintiswano, iMorocco, kumdlalo wemkhumulajezi lolandzelako.

I-Banyana beyidzinga kutsi iwine ngemuva kwekucala kabi umkhankaso wayo, ngemuva kwekwehlulwa yi-Ivory Coast emdlalweni wekucala, yabe seyidlala ngokulingana neTanzania.

Ngaphandle kwekuncoba kwayo, beyidzinga nekutsi i-Ivory Coast yehlule iTanzania kute iBanyana idlulele embili.

Loko kwentekile njengoba i-Ivory Coast incobe nga 2-1 yacedza ihamba embili ecenjini ngemaphuzu lasikhombisa, kwatsi iBanyana Banyana yadlulela embili ngemaphuzu lamane.

IBurkina Faso yacishe yalinganisa ekucaleni kwesigamu sesibili ngemva kwekunikwa iphenalethi,
kodvwa nompempe wemdlalo wagucula sincumo sakhe ngemva kwekubuka iVAR.

I-Banyana ibe nalamanye ematfuba ekwengeta emagoli, kodvwa yehluleka kuwasebentisa.

Ekugcineni, nozinti Kaylin Swart wente umsebenti lomuhle kakhulu ngekuvimba yonkhe imizamo yeBurkina Faso.

Story by Nkosinathi Masinga