I-KAIZER CHIEFS IBUKENE NENKINGA YEBADLALI LABANGEKE BADLALE NGALWESITSATFU

Licembu le-Kaizer Chiefs libukene nenkinga yebadlali lebangeke badlale kulomdlalo we-Betway Premiership ngalwesitsatfu nelicembu le-Mamelodi Sundowns e-FNB Stadium.

Lisekela lemceceshi we-Amakhosi Cedri Kaze ukhipha umbiko ngebadlali labalimele futsi lebangeke badlale kulomdlalo wabo lolandzelako. I-Amakhosi ibenesicalo lesihle kuleligi ngemuva kwekutsi bancobe i-Stellebosch FC, i-Polokwane City kanye ne-Richards Bay.

Kodvwa batolingwa emcudzelweni wabo nemachawe lavikela le-ligi i-Sundows ngalwesibili, i-Kaizer Chiefs iveta kwekutsi incenye yebadlali ibanjwe mkhuhlwane, bese Aden McCarthy kusukela walimala naye.

“Mayelana na-Aden, usengaka tilolongi kusukela lelalanga. Basebenti betemphilo basebenta ngekutikhandla kutsi alulame abuyele futsi enkhundleni kodvwa kuoyomele silindze sibone kwekutsi kusasa uchuba njan kute sitsatse sincumo kwekutsi ubayincenye yebadlali labatodlala.” Kusho lisekela lemceceshi we-Kaizer Chiefs.

“Kuna Shinga na-Cross labo kusukela malanga lambadlwana bayagula. Ighodaro naye ulimele ngesikhatsi sekutilolonga malanga lamabili landlulile. Kodvwa  phandle kwaloko labanye bakahle baphilile futsi bawulungele lomdlalo.

Kaze uphindze wachaza kwekutsi kungabikhona  kwa-Given Msimango na-Rushwin Dortley kutawuchubeka kuyofika lenyanga letako. “Loko kulimala lokubekhona sikhatsi lesidze.”

Ungetele watsi, “Msimango uchuba kancono, kodvwa akusibo badlali lengitsemba kwekutsi batoba natsi kulenyanga, mhlawumbe Msimango kulenyanga letako, Dortley naye kulenyanga letako kodvwa ledi.”

I-Chiefs iyobe yamukela licembu le-Sundowns ngensimbi ya-19:30 e-FNB Stadium ngalwesitsatfu.