IChiefs, Sundowns, Kathorus Hyper Academy neRandburg AFC badlulele kowandulela owamanqamu

Usuku lwesibili lwe-Gauteng Engen Knockout Challenge 2024 luhambe kahle namuhla njengoba amaqembu amane edlulele kuma-Semi-final alo mqhudelwano.

Ompetha abavikela lo mqhudelwano iMamelodi Sundowns FC bagqame kakhulu kuma’Group Stages’ badlulela kuma-Quarterfinal. KumaQuarterfinals bahlule iHighlands Park FC ngo 1-0 ukuze bazibekisele indawo kowandulela owamanqamu walo mqhudelwano.

Amakhosi nawo abegqame kakhulu ngoLwesihlanu nanamuhla. Le kilabhu iqale ngonyawo oluphezulu kumaQuarterfinal namhlanje. Bashaye amagoli amathathu ngesiwombe sokuqala kwathi amagoli abo ashaywe nguMatala Makhubo, Neo Bohloko no-Ofentse Kgosana.

Leli qembu alizange liwashaye amagoli esiwombeni sesibili kanti lo mdlalo uphele ngo 3-0 kuwina Amakhosi. Amanye amaqembu amabili adlulele kowandulela owamanqamu yiKathorus Hyper Academy neRandburg AFC.

IKathorus Hyper Academy ihlule iWits University FC ngo 2-0 kanti womabili amagoli ashaywe ngesiwombe sokuqala. Ngakolunye uhlangothi iRandburg AFC inqobe ngo 2-1 ibhekene neSuperSport United FC.

Imidlalo eyandulela owamanqamu ihlelelwe kusasa, Julayi 07 eMarks Park Soccer Club, eWits University. IKaizer Chiefs izobe idlala neRandburg AFC kanti iMamelodi Sundowns izobhekana neKathorus Hyper Academy.

Yomibili le midlalo izoqala ngo-09:30 ekuseni. Ababili abaphumelele kowandulela owamanqamu bazobhekana kowamanqamu walo mqhudelwano kusasa.