Lokwente Zwane wasala ancapha yedvwa akhishwa ku-MTN-8
Umceceshi we-AmaZulu FC, Arthur Zwane, sewuvumile kutsi licembu lakhe lisadzinga kucinisa kakhulu emuva.
Loku kwenteke ngemuva kwekutsi likhishwe yiSekhukhune United kwiMTN8.
Utsi emaphutsa lamanyenti emuva ngiwo labangele kutsi i-Usuthu ihlulwe nga-4-3 ngemuva kwesikhatsi lesingetiwe.
Lona kube ngumdlalo wekucala kusukela afike Zwane lapho iAmaZulu ingenelwe khona emagoli lamane.
Loku kumente wakhombisa kukhatsateka ngendlela licembu lelivala ngayo emuva.
“sekusikhatsi ngisho kutsi sidzinga badlali labanemandla kanye nesivinini emuva.
“Kungako sisebentisa labanye badlali ngoba site labasemuva labanesivinini ngalokwanele,” kusho Zwane.
Utsi Riaan Hanamub uyabasita ngesivinini sakhe, kodvwa kusamele kufike lomunye mdlali lotawengeta likhwalithi ngemuva.
Arthur Zwane uphindze wagceka badlali bakhe ngekwehluleka kusebentisa ematfuba lamanyenti labawakhile kulomdlalo.
“Bekufanele sishaye ligoli lesibili sente 2-0, kodvwa sahluleka.
“Uma unika emacembu lanelizinga lelisetulu litfuba lekubuya emdlalweni, ayakujezisa,” kuchubeka yena.
Utsi ngaphambi kwekuphela kwesiwombe sekucala, watjela badlali kutsi behlise umoya futsi balawule umdlalo, njengobe bese kusele imizuzu lembalwa.
Kodvwa bagcine balahlekelwe ibhola, lokwabangela kutsi iSekhukhune itfole ligoli lekulinganisa.
“Esiwombeni sesibili ngibone kuvala ngemuva lokubi kakhulu. Sibaphe emagoli mahhala.
“Bekungakafaneli kutsi umdlali adlule kubadlali betfu kalula kangaka ayoshaya ligoli,” kusho yena.
Arthur Zwane utsee ngemuva kwekulinganisa kwaba ngu-3-3, i-AMaZulu bekufanele iwubulale lomdlalo ngoba yakhe ematfuba lamanyenti.
FUNDZA NALANA: Mailula ubuya ngeligoli lelikhiphe i-Downs enkingeni ku-MTN8
“Lomdlalo bekungakafaneli uze ufike esikhatsini lesengeziwe. Sihlule tsine. Bekufanele siwuncobe lomdlalo,” kuphetsa Zwane.”
Story by Nkosinathi Masinga
