Nozinti Nwabali uveta lokumhlukanise neChippa
Longu nozinti, Stanley ‘Bobo’ Nwabali uvete lokumbange wacela kutsi akhululwe kuChippa United lekayidlalele minyaka lengetulu kulemitsatfu.
IChippa imemetele ngaLwesine ntsambama kutsi seyivumelene nalo nozinti lodzabuka eveni lase Nigeria kutsi bahlukane ngesihle nalelicembu.
LISENETHINI ibese yenta umsebenti loncumekako yachumana nalonozinti ngelicingo yamluma indlebe nyana ngemibuto mayelana nekuhamba kwakhe.
“Hhayi akunakucabana nakancane nje,” kusho yena. “Kube kufika kwesikhatsi nje sekutsi sihlukane ngekutfula neChippa United.”
Ubutwe ngekutsi njengoba acele kukhululwa nje ngabe likhona yini licembu lasekatfole kulo msebenti, uvele nje waniketa impendvulo lejwayelekile.
“Cha, kwanyalo alikho licembu alikho licembu lengikhuluma nalo noma leselingisayinile,” kuchubeka Nwabali ngekuphawula.
IChippa United ikhiphe sitatimende yamemetela kuhlukana nalo nozinti waseNigeria ngekutfula ngaphandle kwekuhishana.
Lelicembu libonge Stanley Nwabali ngemsebenti lomuhle lekawentile kusukela wacala kudlalela lelicembu ngemnyaka wa-2022.
Ngesikhatsi sakhe kuChippa, Stanley Nwabali waphendvuka waba lisotja lebelitsembekile ngisho nasecenjini lesive laseNigeria lapho adlale khona imidlalo lengu-35.
