Owayengumdlali wePirates ucela abalandeli ukuthi beseke iZimbabwe uma isibhekene neBafana
IZimbabwe izobhekana neBafana Bafana namuhla kusihlwa eFree State Stadium emdlalweni wokuhlungela iNdebe yoMhlaba yeFIFA ka-2026 ngo-18:00.
Womabili la mazwe akuGroup C kanti iZimbabwe isendaweni yesithupha ku-log ngamaphuzu amabili kuphela ngemuva kwemidlalo emithathu. Leli qembu liphuthelwe yi-Afcon 2023 ngoJanuwari kulo nyaka. Leli qembu alizange liye e-Ivory Coast ngoba likhishwe.
Ngakolunye uhlangothi iBafana Bafana ibiku-Afcon nonyaka kanti idle ubhedu kulo mqhudelwano. Leli qembu lisendaweni yesine ngamaphuzu amane kuGroup C.
Ngesonto eledlule ngoLwesihlanu iZimbabwe ihlulwe ngo 2-0 komakhelwane bayo iLesotho e-Orlando Stadium. Lo mdlalo bekuwumdlalo weZimbabwe kanti iBafana Bafana idlale ngokulingana ngo 1-1 ekuhambeni neNigeria.
Ekhuluma ngemuva komdlalo ngoLwesihlanu esithangamini nabezindaba ukaputeni weZimbabwe uMarshall Munetsi uthe angathanda ukubona abalandeli beZimbabwe uma sebebhekene neBafana Bafana kusihlwa.
“Uma sesidlala neNingizimu Afrika siyabakhuthaza (abalandeli) ukuthi baphinde beze ngobuningi babo ngoba akukapheli – sisalelwe yibanga elide lomjaho,” kusho uMunetsi.
“Ngakho, sibonga ukwesekwa yibo ngoba siyazi ukuthi baningi abantu baseZimbabwe eNingizimu Afrika. Ngicabanga ukuthi kuzoba umdlalo othokozisayo ngoLwesibili (neBafana Bafana).”
Isikhathi sokugcina la maqembu womabili ebhekana kwakunguNovemba 2021 emdlalweni wokuhlungela imidlalo ye-FIFA World Cup 2022. IBafana Bafana iwine lowo mdlalo ngo 1-0 kwathi uTeboho Mokoena washaya igoli lokunqoba elakuleli.
