Umceceshi we-AmaZulu Arthur Zwane utsi kusasekseni kakhulu, usatocudzelana ne-Mamelodi Sundowns ekutsatseni le-ligi.

Arthur Zwane lowatsatsa mhlalaphasi ekubeni mdlali webhola letinyawo waba nguMceceshi losoke wacecesha licembu lelifana nale-Kaizer Chiefs nyalo unguMceceshi welicembu le-AmaZulu FC.

Utsi uMceceshi mehluko lobekhona kulomdlalo lebasuka kuwo itolo nelicembu le-Sundowns kube lizinga lebadlali. “Tsine sinebadlali labasebancane ebholeni letinyawo futsi lebasafundzako, kantsi i-Sundowns yona inebadlali labasezingeni lelingenhla kakhulu.” Kusho Zwane.

“Nanoma banebadlali labasezingeni kodvwa natsi sibakhombile kutsi singacudzelana nabo kukakhulu kati esigabeni sekucala salomdlalo, sigaba sesibili besidzinga kubeketela nenchubekela phambili.” Kusho Zwane tukwe tindzaba te-Sabc Sports.

Zwane utsi licembu lakhe likhombisile kutimisela kakhulu kulomdlalo, nanoma nje kutawutsatsa tinyanga letimbadlwana kutsi kulungiswe emaphutsa.

“Kubemdlalo lolikhuni kakhulu, kodvwa sikhonile kutfola matfuba lamabili lamakhulu ehhafini yekucala yalomdlalo, kumele ngabe sente ncono ngalamatfuba.” Kuchaza Mceceshi welicembu le-AmaZulu ngemuva kwekuphela kwalomdlalo.

Utsi Zwane kwamele bandzise kukhutsala, balungise maphutsa futsi babuye banemandla kunakucala. Umceceshi we-AmaZulu utsi kons ngeke bayingabate i-Sundowns ilicembu lelikhulu eveni lase-Ningizimu Afrika, kwamele kufundwe kulo .