Umceceshi we-Banyana ukhutsata badlali bakhe badliwa iTanzania ku-WAFCON
Umceceshi we-Banyana Banyana, Dkt Desiree Ellis, ufuna kubona licembu libuyela endleleni yekunqoba ngemuva kwekwehlulwa yiTanzania emdlalweni wekucala we-WAFCON 2026.
I-Banyana Banyana ihlangabetane nekwehlulwa nga-2-1 yi-Tanzania.emdlalweni wayo wekucala we-2026 Women’s Africa Cup of Nations (WAFCON) kuGroup B lodlalelwe eCasablanca ngaMsombuluko.
U-Twiga Stars levule indlula ngeligoli lekucala nga-Diana Msewa, nobe iBanyana beyikhona kubamba ibhola kakhulu kodvwa yehluleka kusebentisa ematfuba ayo ekushaya emagoli.
Bambanani Mbane ulinganise emagoli ngesikhatsi sekwengetwa sikhatsi sanompempe esigabeni sekucala salomdlalo, kodvwa Hasnath Ubamba washaya ligoli lekuwina ngasekupheleni kwesigamu sesibili.
INingizimu Afrika itfole ematfuba lamabili ekushaya ligoli emizuzwini lelishumi yekucala nga-Thembi Kgatlana, kodvwa kudubula kwakhe akuzange kumkhatsate nozinti wase-Tanzania.
Noxolo Cesane naye watfola litfuba ngemuva kwekudluliselwa ngu-Kgatlana, kodvwa ibhola laphambuka laphumela ekhoneni. Cesane waphindze watfola lelinye litfuba livela ku-Kgatlana, kodvwa wehluleka kulisebentisa.
Ellis ukhutsata badlali bakhe kutsi babuyele emandleni, avuma kutsi ematfuba labawatfolile abazange bawasebentise, kwatsi iTanzania yasebentisa ayo.
“Emagoli ngiwo laniketa licembu kuncoba. Besati kutsi iTanzania itawudlala njani, kodvwa emagoli lamabili lesiwavumelile abebuhlungu. Batfole ematfuba lamabili, bawasebentisa base bayanqoba,” kusho Ellis.
“Ngasho ngaphambi kwekucala kwemdlalo kutsi utawuba matima, kodvwa natsi sente kwaba matima kitsi.
“Bengati kutsi yonkhe imidlalo yelicembu itawuba matima, kodvwa kucala kahle bekutasisita. Nyalo umdlalo lolandzelako ufana newemancamu ngaphambi kwewemancamu. Kufanele siwuncobe kanye nalolandzelako,” kungeta lomceceshi.
“Sisenalo litfuba lekutfola imiphumela lemihle. Akusilo lilanga lelihambe kahle kitsi, futsi singenta ncono kunaloku. Angeke sisalahlekelwe ngemaphuzu ngoba kudlulela emjikelezweni lolandzelako kutawutfolwa ngemacembu lamabili kuphela,” kushonyena ayivala.
Fundza NALANA: Shalulile uvumbula likhaya lelisha eveni lase-Tanzania
