Ashley Du Preez nemlayeto lobuhlungu acedza kuhlukana ne-Kaizer Chiefs
Ashley Du Preez sewubhale umlayeto lotsintsa inhlitiyo avalelisa kuKaizer Chiefs ngemuva.kwekujoyina ngalokusemtsetfweni iStellenbosch FC.
Lomgadli loneminyaka leyi-29 ngebudzala wetfulwe Stellenbosch ngaLesibili.
Kubuyela kwakhe kuStellies bekuyincenye yesivumelwano sekushintjana ngebadlali, lesente Langelihle Phili wajoyina iKaizer Chiefs.
Ashley Du Preez ushiya iKaizer Chiefs ngemuva kwekuyidlalela emasizini lamane, njengoba wayijoyina asuka kuStellenbosch nga-2022.
Nakakhuluma etinkhundleni tekuchumana, Ashley Du Preez ubonge wonkhe umuntfu lobeyincenye
yeluhambo lwakhe eNaturena.
“Ngemuva kweminyaka lemine lengingasoze ngayikhohlwa, sekusikhatsi sekuvala lesahluko lesingifundzise lokunyenti ngemphilo,” kubhala Ashley Du Preez.
“Ngibonga iKaizer Chiefs ngekungikholwa njengemfana lobekanemaphupho nangekunginika litfuba lekugcoka lijezi lalelicembu lengakhula ngilitsandza.”
FUNDZA NALANA: Mabasa uveta imfihlo ngesikhatsi sakhe ku-Pirates: “Nami besengicala kudideka.”
Utsi kudlalela licembu lebekalitsandza kusukela asemncane bekuliphupho lelikhulu kakhulu emphilweni yakhe.
“Ngibonga bonkhe baceceshi, badlali lengidlale nabo, basebenti nabo bonkhe labasebente ngemumva kwetigcawu.
“Tidzingo, tinselelo, kuncoba, kwehlulwa kanye netinkhumbulo konkhe kungisite ngaba ngumdlali kanye nemuntfu loncono.”
Uphindze wabonga balandzeli beKaizer Chiefs ngekumeseka ngaso sonkhe sikhatsi.
“Kubalandzeli, ngiyabonga ngelutsandvo lwenu, kungeseka kwenu nekuma nami etikhatsini letimnandzi naletimatima.
“Kugcoka leli jezi nekuva emavi enu kutawuhlala kunendzawo lekhetsekile enhlitiyweni yami.
“Njengobe sengicala sahluko lesisha, ngihamba ngigcwele kubonga nekutiniketa ngako konkhe lengikutfole kulelicembu.
“Ngiyabonga kuKaizer Chiefs ngeminyaka lemine lengingasoze ngayikhohlwa,” kusho yena.
Njengobe sekasivala sahluko sakhe kuKaizer Chiefs, nyalo Ashley Du Preez utawuchubeka nekwenta
kahle futsi kuStellenbosch FC.
Story by Nkosinathi Masinga
