CEDRIC KAZE UTSI I-CHIEFS SEYIKHONA NEKUPHEFEMULA
Lisekela mceceshi Cedric Kaze utsi kuphumelela kulomdlalo we-CAF Confederation Cup ubange kukhululeka nekukhona kuphefumula, futsi ungaba ingungcuko yelizinga lekuwina.
I-Kaizer Chiefs iphumelele kumdlalo wabo wesigaba sesibili se-CAF Confederation Cup lapho khona bancobe licembu laseveni lase-Angola i-Kubuscorp ngemaphenathi la-5 ku-4 e-FNB Stadium ngeMgcibelo, lapho khona nozinti we-Kaizer Chiefs Peterson abambe khona iphenathi yinye kulomdlalo.
Lomdlalo uphele ngeligoli linye ecandzeni ngeligoli le-Amakhosi, bebalinganisa lomdlalo nga1-1 nge-(aggregate). Bagucule kudliwa kwabo kwalemidlalo lemitsatfu lebahluleke kuyiwina, kufaka ekhatsi nemidlalo ye-Betway Premiership, Kaze uvumile kutsi lemiphumela beyidzingeka yalomdlalo kuvuselela umfutfo wenchubekela phambili.
“Kuyinkhululeko lekhulu kuphumelela kuya kulesigaba lesilandzelako, futsi kubalulekile kwacha lomgcondvo wekuphumelela tukwebadlali bonkhe ngekuphelela.”
I-Chiefs beyiwubambile lomdalo ehhafini yekucale, bakhona nekutfola ligoli nga-Glody Lilepo phakatsi ebhokisini. Kodvwa i-Kabuscorp ukhombise kuba nenkhani yesicoco, babeketela kulomdlalo wate wayofika emlotseni.
Kaze uphawule ngalomdlalo.
“Ngicabanga kwekutsi kulehhafu yekucala yalomdlalo sitfole ematfuba lamatsatfu noma lamane kutsi sishaye emagoli, futsi kuya ehhafini yesibili yalomdlalo, asikadlali ngalendlela bekufanele sidlale ngayo, kantsi futsi kube nekulwa nyana ekhatsi lokuphazamise lomdlalo.”
Kulomdlalo wabo lolandzelako we-CAF inter-club competition kulindzeleke kwekutsi i-Chiefs ibukane nalinye licembu kulamacembu lamabili i-Simba DC yase-Congo-Brazzaville ne-Djamel yse-Comoros, ngemhlaka-17 kuya ku-19 kulenyanga letako ye-Imphala 2025.
