Gould ugcugcutela i-Chiefs ne Pirates kutsi bashaye titayela(showboating)

Morgan Gould, Longumdlali wakudzala we-Kaizer Chiefs, akavumelani nembono wa-Hlompho Kekana ngalendlela badlali be-Chiefs bafaka shukela ngakhona enkhundleni.

Kekana ukhulume kabuhlungu nga-Mduduzi Shabalala, ngemuva kwekutsi acale kufaka shukela enkhundleni anongotelise lomdlalo wabo nelicembu le-AS Simba ku-CAF Confederation Cup.

Shabalala ucale kushaya titayela anandzisa lomdlalo ngalesikhatsi i-Chiefs iwina ngemagoli la-3-o kulomdlalo.

I-AS Simba itfole ligoli lekubika ngenca yekutsi be-Chiefs basungule kushaya titayela letibange lelicembu latfola ligoli.

Lomdlalo uphele ngemagoli la-3-0 i-Kaizer Chiefs yancoba lomdlalo, lokubente baphumelela kuyaphambili kulomncitiswano.

Kekana utse lokwentiwe i-Chiefs kudzelela titsa tabo noma balelicembu le-AS Simba, akukabaluleki emdlalweni losezingeni leliphakeme.

Gould yena-ke uphikisa umbono wa-Kekana, utsi kushaya titayela enkhundleni kuyincenye yemdlalo kulendza injabulo nebunandzi kubalandzeli.

“Emacembu awsasafani, kantsi futsi ngaloko, balandzeli bebhola letinyawo badzinga kujabuliswa ngetitayela enkhundleni kakhulu kati uma ngabe licembu liwina ngemagoli lamanengi,” kusho Gould.

“Balandzeli labaphumelela kuya enkhundleni babalandzeli be-Kaizer Chiefs nebe Orlando Pirates, nyalo lamacembu omabili kudzingeka ajabulise balandzeli babo enkhundleni legcwele balandzeli,’ kusho Gould.