KHANYISA MAYO ANGEKE ADLALE KULOMDLALO WANGEMGCIBELO WE-CAF CONFEDERATION CUP
Khanyisa Mayo losandza kusayinwa kulicembu le- Kaizer Chiefs angeke adlale kumdlalo wangeMgcibelo we-CAF lapho khona i-Chiefs iyobukana nelicembu le-Kabuscorp.
Mayo akamange abhaliswe ku-CAF ekucaleni kwalenyanga. Ngalesikhatsi kubhaliswa badlali kwekucala Mayo bekasengakafiki kulicembu le-Chiefs, ngako ke abamange bakhone kumbhalisa kulesigaba sekucala se-CAF.
Sikhatsi sekubhalisa badlali ku-CAF sivale ngeti-31 kulenyanga ye-Ingci,ngaleso sikhatsi Mayo bekangakasayinwa.
Kodvwa sigaba sesibili sekubhalisa badlali sivuliwe sitawuvalwa nge-30 Inyoni 2025, lokuchaza kutsi i-Chiefs inalo litfuba lekubhalisa Mayo ku-CAF.
Mayo vele ngeke adlale nelicembu le-Kabuscorp mdlalo wekucala we-CAF, noma kusekhaya noma ngaphandle ngeke adlale.
I-Chiefs inaso sikhatsi sekubhalisa Mayo kulesigaba sesibili sekubhalisa badlali ku-CAF. Mayo futsi usalindzele maphepha akhe kutsi akhone kubhaliswa ku-CAF naku PSL.
Licembu le-Kaizer Chiefs lelihleli kunombolo 3 nemaphuzu la-13 ngemuva kwekutsi lelicembu lidliwe Sekhukhune United lokuningi kuntjintjile, kantsi ke mdlali lofana naMayo bayamdzinga kulesimo lebabukene naso.
Lelicembu licale kahle kumidlalo yabo yekucala yalesizini, bawina midlalo lemine badlala kulingana kumunye, badliwa munye. Loku kubange kwekutsi i-Sekhukhune United iyohlala kunombolo yekucala yelitafula leligi.
