Kudvonswa kwe-CAF: I-Pirates ne-Chiefs sebati timbangi tabo tekucala
Emacembu lamakhulu aseNingizimu Afrika, i-Orlando Pirates ne-Kaizer Chiefs, sebati emacembu labatawubukana nawo emikhankhasweni yawo ye-CAF ngemuva kwekutsi kudvonswe imidlalo yemjikeleto wekucala (preliminary round) ngaLesine.
I-Pirates itawumela iNingizimu Afrika ku-CAF Champions League kanye nebavikeli besicoco, iMamelodinSundowns, kantsi iKaizer Chiefs neDurban City batawuncintisana ku-CAF Confederation Cup.
I-Buccaneers idvonswe neLa Cure Waves yaseMauritius emjikeleteni wekucala we-CAF Champions League.
Nangabe iPirates yehlula lelicembu laseMauritius, itawubukana nalotawuncoba emdlalweni losemkhatsini we-AS Mangasport yaseGabon ne-African Stars yaseNamibia emjikeleteni wesibili.
Labavikeli besicoco, iMamelodi Sundowns, banikwe stand-bye emjikeleteni wekucala, ngako batawungena emncintiswaneni emjikeleteni wesibili.
Licembu laMiguel Cardoso litawudlala nalotawunqoba emkhatsini weWiliete Benguela yase-Angola neForesters FC yaseSeychelles.
IKaizer Chiefs nayo inikwe stand-bye emjikeleteni wekucala we-CAF Confederation Cup ngemuva kwekutinikela litfuba lekudlala kulomncintiswano.
Emjikeleteni wesibili, i-Amakhosi itawubukana nalotawuncoba emkhatsini weFC Rouge yaseMadagascar neRed Arrows yaseZambia, lapho kutawube kubangwa khona indzawo yesigaba semacembu (group stage).
Kulolunye luhlangotsi, iDurban City itawucala umkhankhaso wayo emjikeleteni wekucala lapho idvonswe khona neRukunzi FC yaseBurundi.
Nangabe licembu laseKwaZulu-Natal lidlulela embili, litawusondzela ekutfoleni indzawo emlandvweni ngekungena esigabeni semacembu se-CAF Confederation Cup.
FUNDZA NALANA: I-Chiefs ‘ishaye’ iPirates ekusayineni losematseni we-Stellenbosch
Yonkhe imidlalo yemjikeleto wekucala itawudlalwa ngemilente lemibili, kantsi labatawuncoba batawudlulela esigabeni lesilandzelako semincintiswano lemikhulu yemacembu e-Afrika.
Story by Nkosinathi Masinga
