Ncikazi ugadla kulabagceka iPirates ngesicoco se-ligi
Lisekela lemceceshi we-Orlando Pirates, Mandla Ncikazi, seliphendvule kulabo labagceka indlela liwine ngayo sicoco se-Betway Premiership ngesizini leyengcile.
I-Pirates yacedza iminyaka leyi-14 ingakasiphakamisi lesicoco ngemuva kwekwehlula i-Orbit College nga-2-0 ngemdlalo wekugcina wesizini leyengcile.
Kodvwa, womabili lamagoli abewukutinikela kwebadlali be-Orbit, lokwabangela tinsolo tekutsi lomdlalo bewuhleliwe.
Akhuluma kudokhumentari yelicembu, i-Bucs Camp, Ncikazi uwacitsile lamahlebezi. Utsite bantfu basebentisa lizinga lelehlukile nabakhuluma nge-Orlando Pirates.
Waphawula ngekutsi akusiko kwekucala abona licembu litfola emagoli lamabili ekutinikeleni emdlalweni munye ku-PSL. Waphindze wanika tibonelo temidlalo yeSiwelele neMamelodi Sundowns kanye neKaizer Chiefs ne-AmaZulu, lapho kwenteka khona lokufanako ngaphandle kwekutsi kube nemsindvo.
“Bantfu basebentisa lizinga lelehlukile nabakhuluma nge-Orlando Pirates. Akusiko kwekucala kubona licembu litfola emagoli lamabili ekutinikeleni emdlalweni munye.” Kusho Ncikazi.
“Kungani kuba yinkinga kuphela nakwenteka kuPirates? Loko kukhombisa kutsi bantfu labanengi abafuni kubona iPirates iphumelela. Nawuphumelela, kuyohlale kukhona labangafuni kukubona uphumelela.” Kuchubeka yena.
Ncikazi ukholelwa kutsi labanye abafuni kubona iPirates iphumelela, futsi utsi nobe lelicembu linesicuku lesikhulu sebasekeli, kuyohlale kukhona labangajabuli nababona liphumelela futsi liwina tincintiswano.
FUNDZA NALANA: Pitso uphawula ngekusebenta ku-Bafana Bafana
