I-AmaZulu ishaye i-Chiefs ‘ngestini’ ekusayineni lomdlali we-TS Galaxy

Sekuphelile kucagela ngaSiphesihle Maduna, njengobe sekajoyine ngalokuphelele ku-AmaZulu FC ngemuva kwekukhululwa yiTS Galaxy.

Lomdlali loneminyaka leyi-26 budzala ubuyela kulelicembu lelamnika litfuba lekucala lekudlala ibhola lebhadalako.

Maduna ufika ngemuva kwekudlala tikhatsi letimbili letinhle kuTS Galaxy, lapho adlale khona imidlalo lengu-55.

Ngaphambi kwekuya ku-Galaxy, Maduna bekadlalela iCape Town Spurs, layishiye ngemuva kwekutsi lelicembu lehliselwe esigabeni lesingaphasi.

Ekucaleni kwemsebenti wakhe,wacitsa sikhatsi lesinyenti ku-Usuthu, lapho adlale khona imidlalo lengu-86 washaya emagoli lasikhombisa.

Kulindzeleke kutsi kubuya kwakhe kutawucinisa sisu selicembu la-Arthur Zwane, njengobe AmaZulu afuna kuchubeka akhe licembu lelitawulwela tintfo letinkhulu kule sizini.

Maduna, lobekake wahlotshaniswa neKaizer Chiefs, utsite ujabule kakhulu ngekubuyela ekhaya.

“Ngijabule kakhulu ngekubuyela ku-AmaZulu FC, licembu lelanginika litfuba lekudlala ibhola lebhadalako.

“Ngilangatele kakhulu kuphindze ngigcoke imibala lelihlata nalemhlophe futsi ngisite licembu lifeze tinhloso talo kule sizini,” kusho Maduna.

FUNDA NALA: Lokwente Zwane wasala ancapha yedvwa akhishwa ku-MTN-8

Kufika kwa-Siphesihle Maduna kunika Zwane lenye indlela lenhle esiswini
selicembu, njengobe AmaZulu achubeka nekucinisa sikwati sawo.

Inhloso yawo kwenta ncono kulendzawo yesine labaphelele kuyo ngalesizini leyengcile.

Story by Nkosinathi Masinga