I-Chiefs icwayisa ngebakhwabanisi beligama layo
I-Kaizer Chiefs ikhiphe secwayiso emmangweni mayelana nemaphepha nemaphosta emgunyathi lasakatjalaliswa etinkhundleni tekuchumana nakuWhatsApp.
Amakhosi atsi onkhe lamaphosta latsi licembu libita badlali kutsi bete kutewuhlolwa likhono, akasiwo emaciniso.
Licembu liphindze lagcizelela kutsi alinalo luhlelo lwekuhlola badlali eKaizer Chiefs Village, leseNaturena eGoli.
Liphindze latsi alikaze licele imali kubatali nome kubadlali kuze emabito abo afakwe ku-tukweluhla lwemabito.
I-Kaizer Chiefs itsi nangabe ubona sikhangiso lesinemininingwane yasebhange, nome lesicela bantfu kutsi batfumele imali ngenombolo yamakhalekhukhwini, nome sisebentisa likheli le-Gmail, kufanele wati kutsi lowo ngumkhonyovu.
Licembu lincuse bantfu kutsi bacaphele kuze bangalahlekelwa yimali kubakhwabanisi labasebentisa ligama layo.
FUNDZA NALANA: I-Sundowns ibika lijezilayo lelisha lelinetinkanyeti letimbili
Amakhosi atsi nome ngubani losola kutsi uyakhohliswa, nome lofuna kucinisekisa kutsi simemo sekuhlolwa likhono lesihlobene nelicembu sicinisile yini, kufanele achumane nelihhovisi lalelicembu ngco.
I-Kaizer Chiefs inelitsemba lekutsi lesecwayiso sitawusita kuvikela balandzeli kanye nebadlali labahlangabetene nekukhohliswa ngalobukhonyovu.
