IChiefs isinqume ukuhlukana nabadlali abathathu abanamava

Njengoba sibheke kwisizini ka-2024/25 iKaizer Chiefs FC isiqalile ukudedela abadlali njengoba ikhiphe abadlali abathathu namuhla.

Amakhosi akhulule uKeagan Dolly, Siyethemba Sithebe noSfiso Hlanti. Leli qembu linqume ukungazivuseleli izinkontileka zalaba badlali abathathu. Laba badlali abazange bazilolonge neqembu izolo nanamuhla.

Amakhosi abatshele namuhla ukuthi ngeke bazivuselele izinkontileka zabo. Omunye umdlali oshiye Amakhosi nguNjabulo Ngcobo.

UNgcobo ujoyine iSekhukhune United FC kwinkontileka yeminyaka emithathu. IBabina Noko ayizange imthenge njengoba inkontileka yakhe naMakhosi izophela ekupheleni kwale nyanga.

U-Itumeleng Khune ubekhona eNaturena Village izolo. Nokho ukaputeni weKaizer Chiefs ubengeyona ingxenye yabadlali abebephelelwe yinkontileka abatshelwe ukuthi beze namuhla ukuze baziswe ukuthi ngeke zelulwe izinkontileka zabo.

Inkontileka yakhe iphela mhla zingama-30 kuNhlangulana. Amakhosi maduze azonquma ngekusasa lika-Itumeleng Khune.