I-Paris Saint-Germain F.C seyiphindze yacuph’umlandvo ngekutsi icukule indzebe ye-UEFA Super cup
Licembu lase-France i-Paris Saint-Germain FC liphindze lacukula lenye indzebe ye-UEFA Super Cup incoba licembu le-Tottenham Hotspurs FC itolo, lomdlalo uphelele emlotseni.
Phakatsi enkhundleni lamacembu adlale alingana ngemagoli lamabili kulamabili, wase uphelela emlotseni (penalties), i-Paris Saint-Germain iphumelele kufaka emaphenathi lamane kantsi i-Tottenham yona ukhone kufaka lamatsatfu.
Kucale i-Tottenham yashaya ligoli lekubika ehhafini yekucala yalomdlalo, ligoli lelishatjwe ngu-Micky Van de Ven, loneminyaka lenge-24 ngebudzala.
Ehhafini yesibili yaphindza futsi i-Tottenham yashaya lelinye lesibili ngemdlali Cristian Romero loneminyaka lenge-27 ngebudzala waseveni lase-Argentina ngekutalwa.
Kutse mdlalo soyophela kusele sikatsi lesifishane kutsi uphele balandzeli sebalahle nelitsemba yashaya i-Paris Saint-Germain ngemdlali Lee Kang-in waseveni le-Ningizimu ye-Korea loneminyaka lenge-24 ngebudzala.
Ngesikhatsi sekugcina-ngi lebesingetwe ngusomphemphe yatfola ligoli lesibili i-Paris Saint-Germain FC ngemugadli walo lomkhulu Goncalo Ramos, loneminyaka lengemashumi lamabili ngekutalwa waseveni lema-Putukezi.
Isindze ngekulambisa i-Paris Saint-Germain kulomdlalo lobe yimphumelelo lehle kakhulu wakhanyisela nemdlali lotfole umklomela wekuba mdlali lodlale kahle kakhulu kulomdlalo Ousmane Dembele waseveni lase-France loke wadlalela i-FC Barcelona yase-Spain.
Lomunye webadlali losemncitiswaneni wemklomelo lomkhulu lobitwa ngekutsi i- Ballon d’Or, lomdlali ubonakala atsembisa kuphumelela kulomncitiswano.
Umceceshi welicembu le-Paris Saint-Germain Luis Enrique waseveni lase-Spain ngekutalwa sotsatse tindzebe letine kusukela acale kuhola lelicembu ngemnyaka wa-2023, lena indzebe yakhe yesihlanu nalelicembu , futsi kubukeka ngatsi ngeke agcine lana.
