IChiefs isinqumile ngekusasa lesinye isihlabani sayo
IKaizer Chiefs FC isinqume ngekusasa lomdlali wayo wasesiswini ongadlalanga imidlalo eminingi ngesizini edlule ngenxa yokulimala.
UMatlou ujoyine Amakhosi ngo-2022 wasayina inkontileka yeminyaka emibili. Lo mdlali uke wadlalela iMoroka Swallows FC ngaphambi kokujoyina izinkunzi zaseSoweto.
Yize engazange adlale imidlalo eminingi ngesizini edlule ngenxa yokulimala Amakhosi enze isinqumo esihle ngekusasa lakhe eNaturena. Ngokubika kweSABC Sport lo mdlali usayine inkontileka entsha yonyaka naMakhosi.
Ngesizini yakhe yokuqala eNaturena lo mdlali udlale imidlalo engu-12 kuphela yeligi ngaphansi komqeqeshi u-Arthur Zwane. Ukwazile ukuthi okungenani abe nomsizi [assist] oyedwa kuleyo sizini ngaphansi kwegama lakhe.
Ngesizini edlule akazange adlale imidlalo eminingi ngenxa yokulimala akutholile. Udlale isihombe sokuqala sesizini kuphela ngesizini ka-2023/24.
Sekuphele iminyaka eyisishiyagalolunye impela Amakhosi enganqobi izindebe. Bagcina ukunqoba isicoco ngesizini ka-2014/15 bedla isicoco se-Absa Premiership ngaphansi komqeqeshi uStuart Baxter owabe walishiya leli qembu.
Le kilabhu ayizange ibe nesizini enhle neze ngesizini edlule. Amakhosi aqede endaweni ka-10 ngamaphuzu angu-36 kuphela emidlalweni engu-30 yeligi.
Le kilabhu isivele ihlukene nabadlali abane. Bahlukane noKeagan Dolly, Siyethemba Sithebe, Sfiso Hlanti noNjabulo Ngcobo. UNgcobo uzojoyina iSekhukhune United FC kanti abanye abadlali abakawatholi amaqembu.
