Impela okwenzeke kwiChiefs kule sizini siyokuxoxela amagwababa echobana

IKaizer Chiefs FC yehlulekile ukuqeda kuTop 8 kule sizini njengoba ihlulwe ngo 2-0 ibhekene neqembu laseKapa iCape Town Spurs FC namuhla ntambama koweDStv Premiership.

Lo mdlalo ubuse-DHL Stadium kanti Amakhosi ahlulekile ukushaya igoli okungenani elilodwa kulo mdlalo. Igoli lokuqala lishaywe nguCupido kwathi elesibili lashaywa ngumdlali onamava, uMichael Morton.

IKaizer Chiefs FC ize kulo mdlalo idlale ngokulingana ngo 0-0 nePolokwane City FC eFNB Stadium ngesonto eledlule koweDStv Premiership. Ngakolunye uhlangothi iCape Town Spurs iphinde yadlala ngokulingana neLamontville Golden Arrows FC. Lo mdlalo uphele ngo 1-1.

IKaizer Chiefs FC ibisendaweni yesishiyagalombili ngaphambi kwalo mdlalo kodwa izinto sezishintshile manje. Leli qembu laseNaturena lisendaweni ka-10 kuDStv Premiership.

ICape Town Spurs FC isivele yehlile kuDStv Premiership yayiswa kuMotsepe Foundation Championship. Leli qembu likwazile ukuhlula iKaizer Chiefs FC ne-Orlando Pirates FC kuDStv Premiership kule sizini.

Amakhosi aqoqe amaphuzu angu-36 emidlalweni engu-30 yeDStv Premiership kule sizini. Leli liwine eyisishiyagalolunye, ladlala ngokulingana eyisishiyagalolunye lahlulwa imidlalo engu-12 kuDStv Premiership kule sizini.

Ngesizini ezayo Amakhosi azobe engahlanganyeli kuMTN 8 Cup. Kule sizini ihlulwe kowandulela owamanqamu kuMTN 8 ibhekene neMamelodi Sundowns FC.