UBrilliant Khuzwayo uvuma ukuthi iChiefs yarobha iSundowns
Lowo owayengunozinti weKaizer Chiefs FC ne-Orlando Pirates FC, uBrilliant Khuzwayo, useveze ukuthi waqala ukudlala ibhola ngenxa kaBrian Baloyi.
UKhuzwayo uchithe amasizini ayisithupha kusukela ngo-2012 kuya ku-2018 kwiChiefs kodwa akadlalanga imidlalo eminingi ngenxa ka-Itumeleng Khune.
Ube esewashiya Amakhosi wajoyina izimbangi zendabuko i-Orlando Pirates ngaphambi kokulimala kwamphoqa ukuthi ashiye phansi ngo-2019. Akazange adlale ngisho umdlalo owodwa kumaBhakabhaka ngenxa yokulimala kwakhe.
Ekhuluma neGOAL uKhuzwayo uveze ukuthi waqala ukudlala ibhola ngo-1998 ngenxa kaBrian Baloyi owayengunozinti weKaizer Chiefs FC neMamelodi Sundowns FC. UBaloyi wavimba amaphenathi kwiChiefs ibhekene neSundowns ngo-1998.
“Ngiqale ukudlala ibhola ngenxa kaBrian [Baloyi],” kusho uKhuzwayo.
“[Ngaqala ukuthanda uBrian Baloyi] ngo-1998 kwiRothmans Cup lapho [uBrian] evimba amaphenathi kwiSundowns, lapho iChiefs ‘yarobha’ iSundowns futhi namanje iSundowns izwa lobo buhlungu.”
UBrian Baloyi udlale kuMakhosi kusukela ngo-1993 kwaze kwaba ngu-2004. Udlale imidlalo engu-338 ngesikhathi esekwiKaizer Chiefs FC.
Kamuva wajoyina iMamelodi Sundowns FC adlale kuyo kusukela ngo-2004 kwaze kwaba ngu-2010. UBaloyi waphinde wadlalela iBafana Bafana, Amaglug-glug kanye naMajita.
