UMammila ubambe AmaTuks ngo 1-1
IBaroka FC idlale ngokulingana ngo 1-1 namuhla ntambama ne-University of Pretoria FC eBaroka Global Stadium, eLebowakgomo kowePSL Promotion Playoffs.
Lona bekuwumdlalo wesibili kaMammila njengomqeqeshi wesikhashana weBaroka FC. NgoMgqibelo udlale umdlalo wakhe wokuqala neRichards Bay FC ekhaya nakhona babambana ngo 0-0.
Emdlalweni wanamuhla naMaTuks umqeqeshi uMorgan Mammila uqale ngeqembu lentsha njengoba ebophele abadlali abangaphansi kuka23 abayisishiyagalombili eqenjini lakhe.
Womabili la maqembu aqale ngonyawo oluphezulu namuhla kodwa iBaroka ayizange ishaye igoli esiwombeni sokuqala. AmaTuks anqobe isiwombe sokuqala ngo 1-0 ngegoli lika-Abraham alishaye ngomzuzu ka-44 ngesiwombe sokuqala.
Esiwombeni sesibili uMammila wethule ukaputeni wakhe u-Ananias Gebhardt. UGebhardt ushaye igoli elihle ngomzuzu ka-75 okwenze kwaba ngu 1-1. Umdlalo uphele zibambene ngo 1-1 eBaroka Global Stadium.
Womabili la maqembu asesele nomdlalo owodwa iqembu ngalinye kanti azodlala neRichards Bay FC. IBaroka FC isendaweni yesithathu ngamaphuzu amabili kuphela njengoba ihlulwe umdlalo owodwa yadlala ngokulingana kwemibili.
Ngakolunye uhlangothi, AmaTuks asendaweni yesibili ngamaphuzu amane njengoba enqobe umdlalo owodwa, ahlulwa owodwa futhi adlala ngokulingana kowodwa.
IBaroka FC isizodlala umdlalo wayo wokugcina ngoLwesithathu ngesonto elizayo neNatal Rich Boyz eKing Zwelithini Stadium kanti AmaTuks azobe edlala umdlalo wawo wokugcina neRich Boyz ngalo Mgqibelo eTuks Stadium.
