Inkakha yePirates ibabaza ikhono likaGilberto
Ingwazi ye-Orlando Pirates FC, uPhumudzo Manenzhe, ithi amaBhakabhaka abe nohambo oluhle kakhulu kulo nyaka eSpain.
AmaBhakabhaka abeseSpain muva nje ematasa nohambo lwawo lwangaphambi kwesizini. Bekungokwesibili kulo nyaka i-Orlando Pirates yenza imidlalo yokulungiselela isizini eSpain.
Ngesizini edlule baye eSpain bafika eNingizimu Afrika sebenamandla kakhulu. Inqobe iNedbank Cup neMTN8 Cup ihlula iMamelodi Sundowns FC kuyo yomibili imidlalo yamanqamu yale miqhudelwano.
Ngeshwa abenzanga kahle kwiCAF Champions League njengoba behlulwe ngaphambi kokungena kumaGroup Stages. Kule sizini izobe idlala kwiCAF Champions League.
Khonamanjalo, uManenzhe ujabulile ngakubone kumaBhakabhaka ngesikhathi sepre-season eSpain. Uze wathi lawa ngamalungiselelo amahle eCAF Champions League.
“Uhambo olumnandi kangaka kulo nyaka. Njengomuntu wangaphakathi bekufanele ngibuke zonke izikhathi zokuzilolonga, ithuba lokubuka yonke imidlalo edlaliwe,” esho.
“Okugqame kakhulu ukushisa. Abadlali bakwazile ukudlala kulokhu kushisa, ngamalungiselelo amahle eCAF Champions League.
“Ake sibheke umdlalo ongidonse amehlo, yizinsizwa zeSevilla nje. I-Orlando Pirates idlale neSevilla, ngithande igoli elihle likaTimm,” eqhubeka.
“Inhloso yohambo kuze kube manje kumele kube wumqansa kaKabelo Dlamini, uma ebhekene neSevilla. URelebohile Mofokeng, umdlali osemncane ongcono kakhulu ngesizini edlule – ubenza kahle kulolu hambo.
“UMonnapule Saleng ukhiye njengenjwayelo. Abadlali abafana noGilberto, ngicabanga ukuthi uzoba nesasasa kwi-Orlando Pirates uma kuqala isizini. Unesasasa ebholeni futhi unekhono,” ephetha.
AmaBhakabhaka manje abuyele ekhaya kulandela uhambo lwawo lwangaphambi kwesizini oluyimpumelelo eSpain. Badlale imidlalo yobungani emine, banqoba owodwa, bahlulwa owodwa badlala ngokulingana kwemibili.
Le kilabhu izobe idlala neSuperSport United FC ngoMgqibelo kowequarterfinal yeMTN8 Cup. Lo mdlalo uzokuba se-Orlando Stadium kanti AmaBhakabhaka angompetha abavikela lo mqhudelwano.
