Isinqumo esishaqisayo seqembu lePSL ngomqeqeshi walo
ISekhukhune United FC ifake umqeqeshi uLehlohonolo Seema ‘ekhefini elikhethekile’ kuze kuphele isizini njengoba kusasele imidlalo emibili nje vo yeligi.
USeema wenze kahle eqenjini kusukela efikile kanti lesi sinqumo seBabina Noko sishaqise abalandeli abaningi kuleli. Lo mqeqeshi usehlomule ngendondo yomqeqeshi ovelele weDStv Premiership kaFebhuwari/March muva nje.
Emidlalweni yakhe yokugcina eyisishiyagalolunye (9) kwiSekhukhune United FC uSeema uwine imidlalo emibili, wadlala ngokulingana eyisithupha, wahlulwa kowodwa ebhekene neMamelodi Sundowns FC.
ISekhukhune United FC isendaweni yesine kuDStv Premiership ngamaphuzu angu-42 emidlalweni engu-28.
UMacdonald Makhubedi noPaulus Masehe bazobe beqeqesha iBabina Noko emidlalweni emibili yokugcina yeDStv Premiership kuleli qembu.
Le kilabhu izobhekana naMaZulu FC kule mpelasonto ePeter Mokaba Stadium kanti umdlalo wayo wokugcina kuzoba wumdlalo wasekuhambeni neChippa United FC eBuffalo City Stadium ngesonto elizayo ngoMgqibelo.
