Kungani iChiefs ingasayini badlali? Kuphawula Bobby Motaung
Umphatsi welicembu le-Kaizer Chiefs uphawule ngesizatfu lesente bangasayini badlali kuleWindi yaBhimbidvwane.
Xhosa Manyana nguye umdli lobolekwe kuCape Town City, nakhona kulelicembu leChiefs lenkhulisa iDDC.Loweminyaka lengu-20 ngebudzala bekasemabhukwini eligi yeMLS, ecenjini leFC Lincinnati eveni lase USA ngembi kwekutsi abuye eMzansi.
Lamanye emacembu lafana neOrlando Pirates, Mamelodi Sundowns, Sekhukhune United nalamanye, beka loku asayina badlali, kodvwa iChiefs yavele yamangalisa ngevele itsi nya!, kodvwa nje ikhishwe emncitiswaneni wetindzebe letimbili.
Ngekuphawula kwa Motaung , utse lelicembu laseNaturena lize lingasayini badlali kutsi belingafuni kucanganisa tintfo ngalabadlali labakhona nyalo, bakhetse kuchubekela phambili nalabadlali labakhona nyalo lokuncono.
“Sijabulile ngalesikwadi lesinaso nyalo. Khumbula kutsi siletse badlali labasha nalabasebancane lesizini lendlulile,” uphawule kulomhlangano weChiefs neCarling Black Label Sponsorship.
“Siphindze satsatsa badlali kulelicembu leNkhulisa, saphindze sabuka lelizinga lebadlali labasetulu lebaletsile.
“Njengobe nje ngishilo kutsi kunemncitiswano lomkhulu emkhatsini kwalabadlali. Kantsi futsi nje, kusanebadlali labasengakadlali. Basengakanikwa litfuba lekudlala ngenca yelinani lebadlali lesinabo.
“Ngako ke, angeke sikhonondo ngelinani lebadlali lesinabo nyalo, kunebadlali labasezingeni, kubambisana, kanye nemoya lomuhke welicembu.”
Motaung ukubeke kwacaca kwekutsi kwanyalo besingekho sidzingo sekusayina badlali, njengobe lelicembu linebadlali labanyenti labasezinfeni, futsi labakhona kubambisana.
