Lokukhatsata Hugo Broos ngemdlali we-Pirates…
Lomceceshi we-Bafana Bafana Hugo Broos ukhatsatekile ngalomgadli we-Orlando Pirates Evidence Makgopa, ngekunganiketwa litfuba lelanele lekudlala.
Makgopa kusukela kwafika umceceshi Abdeslam Ouaddou akasanikwa kahle sikhatsi sekudlala, esikhundleni sakhe Makgopa kudlaliswa Mbuthuma lobuya ku-Richards Bay.
Broos utsi loku, kwenta umsebenti wakhe ube matima kulelicembu lesive iBafana Bafana, ngoba Makgopa akasitfoli sikahtsi lesanele sekutsi adlale njengobe sekusondzele lomncitiswano lomkhulu we-Ndzebe yemhlaba.
Makgopa ungumgadli lokhaliphile kakhulu kulelicembu le-Pirates nelesive, washaya ligoli lesitsatfu, bashaya iRwanda 3-0, kulomdlalo wekungena kulomncitiswano weNdzebe yemhlaba.
Broos ubenemibuto ngekungaboni badlali bakhe lekabatsembile bangadlaliswa emacenjini abo ku-PSL.
“Kulesinye sikhatsi kuyangimangata kutsi ngibone badlali bangasadlali,” kusho Broos.
“Ubatfola basebhentjini, kulesinye sikhatsi abekho ngisho nasebhentjini. Bese ngitibuta kutsi kwentekeni?
“Ngingakwentela sibonelo nga-Makgopa, akasadlaliswa ku-Pirates, loku kwenta umsebenti wami ubematima.
“Ecinisweni umangabe uya ku-World Cup, uma utawutsatsa umdlali lohlale inyanga angadlali, utiletsela inkinga. Mine kuyangimangalisa kumbona angadlali.”
By:Nkosinathi
