Mane uchazile kutsi kungani alandze badlali bebadubile

Sihlabane se-Senegal Sadio Mane ukubeke kwacaca kutsi kungani aphindze abite badlali bakhe lebebaphume enkhundleni badubile ngesikhatsi lebesingetwe ngu-nompempe kuAFCON 2025, African Cup of Nation Final badlala neMorocco.

Mane ukhombise buholi lobumangalisako ngemuva kwesigameko lesikhulu lesenteke enkhundleni lesikhatsi badlali bahlutfuka baphuma enkhundleni, ngalesikhatsi nompempe Jean-Jacques Ngambo Ndala iphenathi ngesikhatsi sa-95′ wemaminitsi alomdlalo.

Ngemuva kwekutsi iSenegal ngekwayo yalelwe ligoli lelishaye ngesikhatsi sanompempe, incenye yema Lions of Teranga ikhetse kushiya lenkhundla, kanye nemceceshi Pape Thiaw abatjela kutsi abaphume enkhundleni.

Ngako-ke, Mane ubuyele etindlini tekugcokela wayobita labadlali, babuya bonkhe ngekuphutfuma, ngembibkwekutsi Edouard Mendy abambe iphenathi yaBrahim Diaz ye-paneka ngesikhatsi sekulambisa salomdlalo.

Phakatsi kuma-extra-time ngemaminitsi nje lamane, Pape Gueye wadvonsa intsambo yesigadla semtiya washaya ligoli lelihle lelikhulule iSenegal yakhona kutsatsa indzebe ye-AFCON kwesibili.

“Ibhola yetinyawo yase Afrika ilungelwe ngilokuhle lokundlula loku, kucedza lomdlalo ngalendlela….” Mane uphawule ku-Mixed zone lesikhatsi bambuta.

“Ibhola yase Afrika iyatfutfuka ngendlela lesimanga kantsi nemhlaba wonkhe jikelele uyabona. Ngicabanga kutsi kutawudzabukisa futsi kube kabi uma kungatfumelwa sitfombe lesi nje.

“Kungako nje, ehlangotsini lami ngibite licembu lami kutsi litochubeka lidlale. Sidliwe njenge mdvodza, sincobe njengemadvodza. Ngiko loko lesikwentile.

“Ekugcineni kwelelisuku sibe nenhlanhla, sancoba lomdlalo.”