Miguel nemlayeto locinile kubalandzeli be-Chiefs

Umdlali wasemuva we-Kaizer Chiefs, Inacio Miguel, utsi inhloso yema-pre-season bekungasiko kugcila imiphumeleni, kodvwa bekukwakha indlela yekudlala yelicembu.

I-Chiefs icitse emalanga lalishumi e-Spain ilungiselela isizini letako, lapho idlale khona ngokulingana nga-1-1 neRangers FC yaseScotland.

Emdlalweni wesibili yehlulwa yi-Al-Kholood yaseSaudi Arabia nga-2-1, ngaphambi kwekutsi iphindze idlale ngokulingana nga-1-1 ne-Elche CF yaseSpain.

Lemiphumela ayizange ibajabulise labalandzeli be-Chiefs, labebacabanga kutsi licembu belifanele lengete imiphumela lencono futsi libanike litsemba ngaphambi kwekucala kwesizini.

Miguel uchaze kutsi lemidlalo ye-pre-season beyicondze kakhulu ekwakheni indlela yekudlala, kuvisisana kwalabadlali kanye nekufundza ifilosofi
yemceceshi lomusha, hhayi kucondza imiphumeleni kuphela.

“Ngiyavisisa futsi ngiyakuhlonipha kutsi labalandzeli betfu bafuna sihlale sincoba njalo, kodvwa lemidlalo beyiyekutilungiselela.

Besihlose kakhulu kulendlela lesidlala ngayo kunemiphumela, sicija lisu letfu futsi sijwayela imibono yemceceshi lomusha,” kusho Miguel.

“Labaceceshi bajabule ngenchubekelaphambili lesiyentile, futsi nyalo sifuna kuyisebentisa uma isizini seyicala.”

FUNDZA NALANA: Umceceshi we-Banyana ukhutsata badlali bakhe badliwa iTanzania ku-WAFCON

Story by Nkosinathi