Ngabe le-Arrows litawuba inking kule-Pirates?

I-Orlando Pirates itawubukana nemdlalo lobucayi we-Betway Premiership ngoleSitsatfu, nelicembu leliholiwa ngumceceshi Mnqithi lokhombisa kuba ingoti kakhulu kulamalanga.

Lelicembu lase Soweto, livakashela licembu le-Golden Arrows e-King Zwelithini Stadium, lomdlalo utawucala ngensimbi ya-7.30 ebusuku.

Kusukela Mnqithi atsatse tintsambo talelicembu, lelicembu lancoba i-Sundowns 1-0 ngomhlaka-24 enyangeni ye-Inyoni.

Ngaphansi kweticondziso takhe, lelicembu tukwe midlalo yabo yasekhaya bancobe i-Orbit College 3-0, bancoba i-Marumo Gallants 4-0. Loku kuveta bungoti lelicembu lelinabo lamalanga.

Mnqithi noma ngabe-nje lelicembu lakhe lisezingeni lekuwina kulamalanga, uyachubeka atehlise, akafuni kutsi badlali bakhe babe nekutitsemba lokundlulelako.

“Liciniso kutsi sisesigabeni sekwakha, baningi badlali labancane lebasengakavetwa babonwa,” ukhulume ngeliSontfo ngemuva kwekuncoba le-Marumo.

“Baningi badlali lebasengakabonwa, kantsi futsi loko kuyagcugcutela  nje nakimi.

“Ngiletse lisiko lekusebenta kamatima ngekutikhandla kulelicembu.”

Uphindze wangetela etulu, ngekutsi batehlise babambe lizinga lekuba mehlo mane/lekucaphela.

“Kudlala ibhola unemcondvo wekutitjela kutsi angifuni/angivumi kudliwa lana, kufana nemuntfu lodzakiwe,  uma atsi angifuni kuwa.

“Lokucaphela noma lomcondvo ubese uyakhwesha ekudlaleni ibhola nje lejwayelekile.”