OSCAR MBO UKHALA NGEBADLALI BE-CHIEFS
Oscar Mbo lodume ngemculo wase-Ningizimu Afrika, futsi mlandzeli lomkhulu welicembu le-Kaizer Chiefs. Ubhale ku-Instagram yakhe akhombisa kukhatsateka ngemiphumela yelicembu lakhe le-Kaizer Chiefs.
Kulemidlalo lemitsatfu lendlulile lelicembu lihluleke kuwina ngisho namunye umdlalo, ngako ke, lemiphumela itsintse balandzeli labaningi Oscar Mbo wate wabhoboka ku-Instagram yakhe.
“Badlali betfu abayihloniphi lembeji yalelicembu, kwamele sibe nemaciniso. Kunebadlali labangafanelwa kugcoka lelijezi lelidume kakhulu lembala wegolide nalokumnyama futsi kuyanyakulana kukhala ngentfo yinye lebewukhala ngayo kulesizini lendlulile.
“Kusebaleni kutsi inkhinga ayikho tukwebaceceshi, kungatimiseli nekungatikhandli kwebadlali. Floser ngidvumatekile ngawe, msebenti wakho bekumunye nje, kutsi uzuphe ukhiphe ibhola engotini ngenhloko, vikela indzawo yakho. Kodvwa cha, bongacapheli njengenhlala yenteka, kudzala ufikile kulelicembu futsi uyabona kutsi Monyane uyitsetse lendzawo kodvwa wena usenta ngalendlela?” Kusho Mbo ku-Instagram yakhe.
Uchubeke wabhala, “Sirino, usibangele kudliwa kulomdlalo, uhluleka kutsatsa tincumo letikahle futsi netinyatselo lotitsatsako enkhundleni tiyadvumatana, kwamele wente kancono, noma ucele bakumise kancane, ngoba kusukela wafika solo wenta ngalendlela, uhlala udlalela kutsembisa kodvwa awudlali njenganombolo-10 lesimdzingako.
“Mdu, ngicela ukhiphe lesitayela sakho setinwele ukhumbule kutsi kungani wakhushulwa -uyincenye yebadlali besitigcabha ngabo kusukela kulelicembu lelincane , kodvwa wehlise kakhulu nyalo, buyela tukwe bunguwe bakho futsi ukhumbule kwekutsi kunngani besikusekela sikutsandza ngalendlela bodlala ngayo. Namuhla bekungasilo lilanga lakho futsi ngeke sibe nawe ngalendlela kwamele utsatse tinyatselo tekukhuphula masokisi.
Oscar Mbo, uphetse ngekutsi incenye yelicembu ayitimisele ilwe ngekubambisana kute nabo bakhone kudlala licembu liphumelele liyephambi.
