Riveiro uveta imvelaphi yembango wa-Saleng/Imphikiswano ku-Bucs
Jose Riveiro lobekangumceceshi we-Orlando Pirates ukhulume ngalesigameko emkhatsini wakhe na-Monnapule Saleng lesenta kutsi lomdlali angadlali sikhatsi lesidze kulesizini leyengcile.
Riveiro walandzisa imphikiswano yakhe na-Monnapule Saleng kulombukiso walelicembu ngemuva kwetindzaba, ‘ma-Giants’, lasakatwa ngeLisontfo ebusuku.
Sigaba sesibili ‘sema-Giants’ sicaphele ekulahlekelweni kwalelicembu ku-Carling Knockout Cup kanye nekuncoba kwabo nga 1-0 ngesikhatsi badlala ne Kaizer Chiefs ku-Soweto Derby.
I-Pirates ingene emdlalweni we-Carling Knockout ne-Magesi ekhaya, ilindzele kuncoba lokulula.
Kepha batikhandza balandzela ngemuva nga 3-0 ngesikhatsi sekucala, lokubangele umzuzu loshisako ekamelweni lekushintja.
Riveiro wabese ubonakala akhuta badlali lebebasenkhundleni, abuta kutsi kufanele yini ashintje labadlali labasha labasihlanu.
“Ngente njani, ngente tikhundla letisihlanu? Wonkhe umuntfu ukahle yini? Saleng, ukahle yini?” kubuta Riveiro.
Lomdlali lotsandvwa balandzeli wabonakala anikina inhloko, lokukhombisa kutsi akekho esimeni lesihle.
Kulapho umceceshi aphendvula khona: “Cha? Kulungile-ke, phuma. Uphi Nkota?”
Kukhona lowaphendvula watsi Nkota ungaphandle, umceceshi watsi kufanele aletfwe.
Ikhamera yabese ishintjela ku-Riveiro alandzisa lesimo, lapho atsi unemiva yekutsi kukhona lokungahambi kahle ku Saleng.
“Bekusikhatsi sekutsi ngitsatse sincumo lesimangalisako ngaSaleng…
“Kukwenta utibute, ucala kucagela kutsi usalungile yini noma cha, kutsi uyafuna mbamba kudlalela lelicembu noma cha,” kuchaza Riveiro.
“Njengobe siyamati Saleng, siyati kutsi yini langayenta—uhlale akulungele kudlala, uhlale akulungele kunikela ngako konkhe kwakhe, uhlale adlala ngemandla akhe onkhe.”
“Kepha sibe nesigamu sekucala lesingakavami, sibe nemdlalo lodidako neMagesi ku-Black Label Cup.”
“Ngabona kutsi lomfana akajabuli; bekangasuye loyo lesimatiko. bekangasuye lojabulela kuba senkhundleni.”
“Futsi noma ngabe bekufanele agijime emamitha langemashumi lasitfupha kute asite ngekuvikela, bekangenankinga ngako, bekakujabulela. Kepha ngalesikhatsi, bekangekho lapho…”
Saleng wabese uyabonakala ahamba aphuma egumbini lekushintja, Riveiro achubeka nekucoca lendzaba.
“Ngetama kunakisisa emdlalweni, kulabo badlali labafuna kuya enkhundleni bayolwela lelicembu sikhatsi lesitsite.
Riveiro wachaza watsi: “Besinalesinye sikhatsi lesingu-45 nobe lesingu-50, futsi ngetama kungacitsi sikhatsi nobe emandla ngaleyondzaba, kodvwa bekungasiyo intfo lenhle kuyibona.”
Saleng naye wabutwa kafishane ngalesimo, kepha waniketa imphendvulo lengakacaci.
“Yini lebangele lesi simo? Tintfo letinyenti. Tintfo letinyenti tenteka,” washo ngendlela lelula.
Kepha, kusalindzeleke kutsi indzaba lephelele yaSaleng itawuvetwa kuletigaba letilandzelako, njengobe Riveiro asanetincenye talendzaba lekasafuna kutibukisisa.
Labanye badlali nabo kulindzeleke kutsi banikete umbono wabo ngekutsi kwentakeni Giants tisakatwa ngeMasontfo kumabonakudze ku-Supersport.
