Sekufaniswa lomdlali lomusha we-Chiefs nesihlabane sase-France
Lobekangumceceshi welicembu lesive laseTanzania, Adel Amrouche, sewuncome likhono lemdlali lomusha weKaizer Chiefs, Adolf Mtasingwa Bitegeko.
Indlela lamncoma ngayo lomdlali yente wagcina sekamfananisa nesihlabani saseFrance, Paul Pogba.
Amakhosi asandza kumemetela kusayina lomdlali wasemkhatsini loneminyaka leyi-27 ngebudzala, losuka ku-Azam FC yaseTanzania.
Usayine inkontileka yeminyaka lemibili lenelukhetfo lwekuyengeta ngemnyaka.
Adolf Mtasingwa sewube ngumdlali wekucala waseTanzania kugcoka lijezi leKaizer Chiefs.
Amrouche, lowamnika litfuba lekucala kudlalela licembu lesive laseTanzania, utsi lomdlali usenalo likhono lekufeza lokukhulu ebholeni.
“Mudze futsi udlala ibhola ngendlela lelula. Akenti tintfo tibe lukhuni enkhundleni. Angaba ncono kakhulu nakadlala ecenjini lelimetsembako,” kusho Amrouche ku-FARPost.
Uphindze watsi indlela Mtasingwa ladlala ngayo imkhumbuta Paul Pogba.
“Ufana naPogba. Unelikhono lekuphasa ibhola edvute nakhashane. Ngamfaka ecenjini lesive ngalesikhatsi angenalo ngisho nelicembu. Utfobekile futsi unelikhono lelikhulu kakhulu,” kwengeta yena.
Prince Dube, lowake wadlala naye ku-Azam FC, naye ukholelwa kutsi Adolf Mtasingwa utawuba lusito lolukhulu kuKaizer Chiefs.
FUNDZA NALANA: I-Chiefs seyimemetele umdlali wayo lomusha sha!
Dube utsi lomdlali ungumdlali wasemkhatsini locinile, lovikela kahle futsi lokhona kugcina ibhola.
Nobe kunjalo, uvumile kutsi kutawudzingeka ajwayele lijubane lebhola laseNingizimu Afrika.
Mtasingwa ucitse iminyaka lesitfupha adlala e-Iceland, eNorway naseFinland ngaphambi kwekubuyela eTanzania nga-2024, lapho abe ngukaputeni we-Azam FC.
Nanobe alimale sikhatsi lesinyenti ngesizini leyengcile, iKaizer Chiefs inelitsemba lekutsi utawushesha ajwayele imphilo yaseNaturena futsi abe sisombululo sesikhatsi lesidze lesifunwa ngulelicembu emkhatsini wenkhundla.
Adolf Mtasingwa ujoyina iKaizer Chiefs ngesikhatsi lesibalulekile lapho licembu lihlela khona kabusha, futsi kusanemibuto ngelikusasa laThabo Cele kulelicembu.
Story by Nkosinathi
