Base-Korea bagadla lomceceshi bacedza kudliwa iBafana Bafana

Kuhlulwa kwe-South Korea iBafana Bafana kulomdlalo lobalulekile weNdzebe yemhlaba, sekudale umsindvo kulelive.

Sekuze kwangenelela bosatiwako kunkulumompikiswano leshubile, bagadla kabuhlungu umceceshi Hong Myung-bo.

Umlingisi lodumile wase-South Korea, Han Jeong-soo, uze watsi lomceceshi kufanele amukwe nemholo. Ngenca yekudliwa kwelicembu iBafana Bafana.

. FUNDZA NALANA: Lokushiwo ngu-Hugo Broos acedza kucopha umlandvo ne-Bafana

Akamange agcine lapho, waphindze wasola lomceceshi ngekubambelela kulomsebenti ngenca yemali hhayi ngoba anelutsandvo lwalomsebenti.

“Kufanele amukwe lomholo wakhe. Kubukeka ngatsi ubambelele kulesikhundla ngenca yemali kuphela.

“Loku, kubuhlungu kundlula tindzaba tembusave. Lona kubemdlalo lomubi kundlula yonke yeNdzebe Yemhlaba,” kusho yena.

Han usola kakhulu indlela lomceceshi bekahlele ngayo kulomdlalo. Utsi bekangabonakali njengemuntfu bekahlose kuwina kulomdlalo, futsi wagcine asola badlali.

“Belingekho lisu lekuwina kulomdlalo, nekukhetfwa kwebadlali bekunganangcondvo, waze wagcina sekasola badlali.”

Nemculi lodumile welicembu iHighlight, Yoon Doo-Joon, naye uvete kudumala kwakhe ngalesikhatsi abukela lomdlalo ku-YouTube.

“Angikukholwa loku. Ingabe ngiyaphupha? Kuningi lengifuna kukusho kodvwa kuncono ngitfule, ngoba ngitawukhuluma tintfo lengitatisola ngato.

“Ngibukela imidlalo yesive kusukela ngineminyaka lesihlanu, kodvwa angikase ngikibone likulesimo lesi,” kusho yena.

Story by Nkosinathi