Ufaniswa neDayimane ofunwa iChiefs
IKaizer Chiefs FC isemakethe ithungatha abadlali abasha engabathenga ngaphambi kwesizini ka-2024/25.
Le kilabhu ifuna ukuqinisa isikwati sayo njengoba isinomqeqeshi omusha uNasreddine Nabi. UNabi ubekwizinkunzi zaseMorocco i-AS FAR Rabat ngesizini edlule futhi uqede endaweni yesibili kwiligi.
Selokhu efike eNingizimu Afrika njengomqeqeshi waMakhosi lo mqeqeshi kuze kube manje usesayinise abadlali abahlanu abasha. Munye kuphela umdlali obengadlali kwiDStv Premiership kulaba badlali asebasayinisile.
Leli qembu lisayinise uFiacre Ntwari obekwiTS Galaxy FC, Bongani Sam obekwi-Orlando Pirates FC, uRushwin Dortley osuka eKapa kwiCape Town Spurs FC noGaston Sirino oshiye iMamelodi Sundowns FC ekupheleni kwesizini edlule.
Omunye umdlali abamsayinisile umdlali wasemuva wase-Angola uMiguel Inacio. Lo mdlali wasemuva ubedlalela iPetro de Luanda phambilini.
Manje le kilabhu ifuna ukusayinisa u-Asanele Velebayi, 21, weCape Town Spurs FC. Isikhulu esiphezulu seCape Town Spurs FC u-Alexi Efstathiou ukholelwa ukuthi lo mdlali osemncane uyidayimane futhi amadayimane awashibhile.
“U-Asanele uyidayimane futhi amadayimane awashibhile. Siyazi ukuthi kubiza malini ukunisela amasimu ethu. Simbheke iminyaka engu-10,” kusho u-Efstathiou kwiMetro FM.
Leli qembu lifuna nokusayinisa umdlali wasemuva waMaZulu FC. Bafuna ukusayinisa uRiaan Hanamub njengoba isicabha sivaleka ngakwesokunxele ekusayiniseni oweStellenbosch FC uFawaz Basadien.
