UKanu nomyalezo okhethekile kwiNatal Rich Boyz
Lowo owayengumqeqeshi weRichards Bay FC neLamontville Golden Arrows FC, uVusumuzi “Kanu” Vilakazi, uthumele umyalezo omuhle eqenjini lakhe lakudala iRichards Bay FC.
UVilakazi ujoyine leli qembu elizinze KwaZulu-Natal ngonyaka odlule ngesizini ka-2023/24. Ujoyine leli qembu esuka kwiChippa United FC.
Le kilabhu yamqoka ukuthi abe yiphini lomqeqeshi kaKeitano Tembo. INatal Rich Boyz inqume ukuhlukana noTembo yaqoka uVilakazi ukuthi abe ngumqeqeshi waleli qembu.
UVilakazi ukwazile ukuhlenga le kilabhu ezembeni. Baqede endaweni ka-15 kwiDStv Premiership baphinde banqoba iPSL Promotion Playoffs.
KwiPSL Promotion Playoffs badlale namaqembu amabili eMotsepe Foundation Championship. Badlale ne-University of Pretoria FC eqede endaweni yesibili neBaroka FC eqede endaweni yesithathu kwiMotsepe Foundation Championship ngesizini edlule.
Ngemuva kokunqoba iPSL Promotion Playoffs lo mqeqeshi usayine inkontileka entsha neNatal Rich Boyz emasontweni amane edlule.
Khonamanjalo, lo mqeqeshi usenqume ukuyinqamula inkontileka yakhe kuleli sonto. Akaseyena umqeqeshi weRichards Bay FC kanti namhlanje uthumele umyalezo okhethekile kwiNatal Rich Boyz.
“Ake ngithathe leli thuba ngibonge iRich Boyz ngokungethemba nokukholelwa kimina nginolwazi oluncane ngomsebenzi omkhulu kangaka,” usho kanje.
“Ngiyabonga kakhulu ku’Menziwa’ uJomo Biyela. Ngiyabonga ngesikhathi sami kwiRichards Bay FC. Ngifisela iqembu konke okuhle ngekusasa.”
INatal Rich Boyz isiqashe umqeqeshi omusha ngesizini ka-2024/25. Le kilabhu iqoke umqeqeshi uBrandon Truter ngenkontileka yonyaka enenketho yokwelula inkontileka yakhe ngonyaka owodwa.
Ngakolunye uhlangothi uVilakazi kumanje akanalo iqembu kusukela eshiye iNatal Rich Boyz. Uveze ukuthi njengoba engenalo iqembu manje uzokwenza iCAF A Coaching Diploma.
