Ukhonjwa kwelase-‘Europe’ oweChiefs
Angase ashiye Amakhosi umdlali wasemuva weKaizer Chiefs FC njengoba kuneqembu elifuna ukumsayinisa e-Europe.
UGiven Msimango, 27, ujoyine Amakhosi ekuqaleni kwesizini ka-2023/24. Lo mdlali uke waba ngukaputeni weTS Galaxy FC ngaphambi kokujoyina iChiefs.
KuMakhosi ngesizini edlule udlale imidlalo engu-26 yeligi ngaphansi kwegama lakhe. Kwesinye isikhathi lo mdlali ubenikwa ibhande likakaputeni kwiChiefs ngesikhathi uMaart, Khune noDolly bengekho kulowo mdlalo.
Lo mdlali uphinde wathola ithuba lokudlalela iBafana Bafana. Umqeqeshi u-Hugo Broos wambiza ngesikhathi bezobhekana neZimbabwe neNigeria emqhudelwaneni wokuhlungela i-FIFA World Cup 2026.
Khonamanjalo, ikilabhu ephezulu yaseRussia ikhombise intshisekelo yokusayinisa umdlali wasemuva weBafana Bafana neKaizer Chiefs FC uGiven Msimango ngokubika kwe-Idiski Times.
Amakhosi asayinise abadlali ababili basemuva abadlala ‘Centre-Back’ uRushwin Dortley noMiguel Inacio. Kuma Centre-Back kukhona no-Edmilson Dove, Zitha Kwinika noThatayoane Dithlokwe.
UMsimango ufakwe esikwatini sokuqala seBafana Bafana esizobhekana ne-Uganda neSouth Sudan kweyokuhlungela i-AFCON 2025 ngenyanga ezayo. Nguye, uBruce Bvuma noRushwin Dortley beKaizer Chiefs abakhona kulesi sikwati.
